Pakistan – पाकिस्तानमधील दहशतवाद्यांनी आता लहान बालकांनाही लक्ष्य करायला सुरुवात केली आहे. खेळण्यात लपवलेल्या बॉम्बचा स्फोट होऊन किमान ३ बालकांचा दुर्दैवी अंत होण्याची घटना खैबर पख्तुनख्वा प्रांतात घडली आहे. बनाऊ जिल्ह्यातल्या वझीर उपविभागातल्या जानी खेल भागात आज ही घटना घडली.

ही मुले मदरसामधून घरी परतत असताना खेळण्यातल्या बॉम्बचा स्फोट झाला, असे स्थानिक सूत्रांनी सांगितले. मरण पावलेल्या ३ बालकांमध्ये दोन भावांचा समावेश आहे. बॉम्ब असलेले खेळणे बेवारस स्थितीत ठेवून दिले होते. मुलांनी हे खेळणे उचलताच त्याचा मोठा स्फोट झाला. खैबर पख्तुनख्वा प्रांतातील डझनभर मुलांना अशा खेळण्यातल्या बॉम्बच्या स्फोटात जीव गमवायला लागला आहे.

अफगाणिस्तानमध्ये १९८० च्या दशकात तत्कालिन सोव्हिएत रशियाचे राज्य होते, तेंव्हा रशियाकडून अशी बॉम्ब असलेली खेळणी विमानातून टाकली जायची. दक्षिण वझिरीस्तान हा पाकिस्तानातील सात अर्ध स्वायत्त प्रदेशांपैकी एक भाग असून येथे पाक लष्कर तेथे गेल्या दशकभरापेक्षा जास्त काळापासून तालिबानशी संबंधित दहशतवाद्यांचा मुकाबला करत आहे. लष्कराने २०१४ मध्ये शेजारील उत्तर वझिरीस्तानमध्ये दहशतवाद्यांच्या तळांवर धडक कारवाईची मोहीम सुरू केली आहे.