न्यूयॉर्क : जगात एकीकडे  करोनाच्या संकटाने सर्वत्र हाहाकार केला आहे. तर दुसरीकडे  अशा काही घटना समोर येत आहेत ज्यामुळे तुमचे आमचे डोके चक्रावल्या शिवाय राहणार नाही. अशीच एक नात्याला काळिमा फासणारी घटना अमेरिकेत घडली आहे. या घटनेत एका महिलेने आपल्या भाची आणि भाचाचा  खून  केल्याची घटना घडली आहे. हे प्रकरण एवढ्यावरच थांबले नाही तर पुढे जे काही घडले त्याने पोलिसही चक्रावले.

एका महिलेला आपला 7 वर्षांचा भाचा आणि 5 वर्षांची भाची या दोघांच्या हत्या प्रकरणात अटक करण्यात आली आहे. धक्कादायक बाब म्हणजे या महिलेने दोघांचे मृतदेह आपल्या गाडीत ठेवले होते. काही दिवस नाही तर अनेक महिने या दोघांचा मृतदेह गाडीमध्ये होता. हा भयंकर प्रकार मॅरीलँड येथील बालतिमोर काउंटी येथील आहे.

पोलिसांच्या प्रवक्त्यांनी दिलेल्या माहितीनुसार, निकोल जॉनसन 33 वर्षांची आहे. भाचा-भाची गायब होण्यामागे तिचा हात असल्याचा पोलिसांना संशय होता. त्यामुळे पोलिसांनी साधारण रात्री 11 वाजता महिलेची कार एसेक्स भागातील रस्त्यावर थांबवली. आणि गाडीचा तपास सुरू केला. त्यानंतर जे काही दिसलं ते पाहून पोलिसांना धक्काच बसला. या महिलेच्या गाडीत जॉशलिन जॉन्सन (7) आणि लॅरी ओ’नील (5) या दोघांचे मृतदेह सापडले. दोघांचे मृतदेह तपासासाठी पाठविण्यात आले आहेत.

पोस्टमार्टम झाल्यानंतर दोघांच्या मृत्यूचे नेमके कारण कळू शकेल, असे  सांगितले जात आहे. निकोल जॉन्सनवर बाल शोषण आणि लहान मुलांचा जीव घेणे यासह अनेक प्रकरणात गुन्हा दाखल केला जाणार आहे. महिलेने आपली भाची आणि भाच्याची हत्या का केली, यामागील कारण समोर आलेलं नाही. मात्र ही घटना पाहून अनेकांना मोठा धक्का बसला आहे. अमेरिकेत घडलेल्या या घटनेनंतर परिसरात मोठी खळबळ उडाली आहे. पोलिसांना आधीपासून महिलेवर संशय होता. तपासात हे उघड झालं आहे.