मुंबई : राज्यात करोनाची दुसरी लाट ओसरत असल्याचे दिसत असताना आता पुन्हा एकदा बाधितांची संख्या हळूहळू वाढत असल्याचे पाहायला मिळत आहे. त्यातच मुंबईतील एका आश्रमात २२ जणांना करोनाचा संसर्ग झाल्याचे सांगण्यात येत आहे. यात १८ वर्षाखालील १५ विद्यार्थ्यांचा समावेश असल्याचेही म्हटले जात आहे.

कांदिवली (पश्चिम) येथील निवासी संकुलात १७ रहिवासी करोनाबाधित आढळून आले होते. त्यानंतर  आता आग्रीपाडा येथील एका अनाथाश्रमात २२ जणांना संसर्ग झाला आहे. यात १८ वर्षांखालील १५ विद्यार्थ्यांचा समावेश आहे. सर्व बाधितांवर पालिका रुग्णालय आणि कोविड केंद्रात उपचार सुरू असून त्यांची प्रकृती स्थिर आहे. मात्र खबरदारीसाठी महापालिकेने हे अनाथाश्रम सील केले आहेत.

सेंट जोसेफ शाळा आणि अनाथाश्रमातील दोन कर्मचाऱ्यांचा कोविड चाचणी अहवाल २३ ऑगस्ट रोजी पॉझिटिव्ह आल्याने पालिकेच्या ई विभाग कार्यालयामार्फत या अनाथाश्रमातील ९५ जणांची २४ ऑगस्ट रोजी आरटीपीसीआर चाचणी करण्यात आली. यापैकी २२ जण कोरोनाबाधित असल्याचे आढळले.

अनाथाश्रमातील २२ करोनाबाधितांपैकी चार विद्यार्थी १२ वर्षांखालील आहेत. त्यांच्यावर नायर रुग्णालयात उपचार सुरू करण्यात आले आहेत; तर १२ ते १८ वयोगटातील १८ बाधित आढळले आहेत. या सर्वांना भायखळा येथील रिचर्ड्स अँड क्रूडास कोविड केंद्रात दाखल करण्यात आले आहे. यामध्ये सात कर्मचाऱ्यांचाही समावेश असून, सर्वांची प्रकृती आता स्थिर आहे.

एवढ्या मोठ्या प्रमाणात करोनाबाधित आढळल्याने महापालिकेने खबरदारीसाठी अनाथाश्रम सील केले आहे. नियमानुसार १४ दिवस या अनाथाश्रमात प्रवेश प्रतिबंधित असणार आहे. तसेेच पाच दिवसांनंतर पुन्हा सर्व विद्यार्थी आणि कर्मचाऱ्यांची कोविड चाचणी केली जाणार असल्याचे  सांगण्यात येत आहे.