Shivsena Shinde Group : तब्बल दहा वर्षांपासून फरार असलेल्या शिवसेना शिंदे गटाच्या एका बड्या नेत्याला अखेर पोलिसांनी अटक केली आहे. बाबू सुब्रमण्यम कांबळत असे अटक करण्यात आलेल्या नेत्याचे नाव असून ते अहिल्यानगर जिल्हाध्यक्ष पदावर कार्यरत होते. २०१६ मध्ये आष्टी तालुक्यातील सावरगाव येथे पवन ऊर्जा प्रकल्पावर काम करणाऱ्या मजूर अनिल म्हस्के यांच्यावर प्राणघातक हल्ला झाल्याची घटना घडली होती. या प्रकरणात कांबळत हे मुख्य आरोपी होते. हल्ल्यात अनिल म्हस्के गंभीर जखमी झाले होते. या घटनेनंतर १२ जणांविरोधात गुन्हा दाखल करण्यात आला होता. या प्रकरणातील इतर ११ आरोपींना यापूर्वीच अटक करण्यात आली होती. मात्र, बाबू कांबळत गेली अनेक वर्षे पोलिसांच्या हाती लागत नव्हते. अखेर अंभोरा पोलिसांनी सापळा रचत मंगळवारी त्यांना ताब्यात घेतले. विशेष म्हणजे, फरार असतानाही कांबळत यांची राजकीय सक्रियता सुरूच होती. ते शिवसेना शिंदे गटाचे जिल्हाध्यक्ष म्हणून काम पाहत होते आणि विविध प्रचारसभा तसेच सार्वजनिक कार्यक्रमांमध्येही सहभागी होत होते. त्यामुळे त्यांच्या अटकेनंतर राजकीय वर्तुळात मोठी खळबळ उडाली आहे. अटक केल्यानंतर त्यांना न्यायालयात हजर करण्यात आले असून न्यायालयाने त्यांना पोलीस कोठडी सुनावली आहे. या कारवाईनंतर पोलिसांच्या भूमिकेबाबतही विविध चर्चांना उधाण आले आहे.