Shivendraraje Bhosale – वाई, खंडाळा, महाबळेश्वर विधानसभा मतदारसंघातील विकासकामांना निधीची कमतरता भासू देणार नाही. मतदार संघातील विकासासाठी शासन स्तरावर आवश्यक ते सर्वतोपरी सहकार्य करण्याचे आश्वासन सार्वजनिक बांधकाम मंत्री, शिवेंद्रराजे भोसले यांनी दिले. भाजप महाराष्ट्र प्रदेश उपाध्यक्ष डॉ. सुरभी भोसले यांच्या शिष्टमंडळाने वाई , खंडाळा, महाबळेश्वर मधील विकासकामे,

पायाभूत सुविधा आणि नागरिकांच्या प्रलंबित प्रश्नांसंदर्भात मंत्री, शिवेंद्रराजे भोसले यांची भेट घेऊन विविध विषयांवर सविस्तर चर्चा केली. यावेळी डॉ. सुरभी भोसले यांनी परिसरातील विविध विकासकामांचा आढावा त्यांच्यासमोर मांडला. वाई-खंडाळा-महाबळेश्वर परिसराच्या विकासाला अधिक गती मिळावी, ग्रामीण भागातील रस्ते व पायाभूत सुविधांची कामे मार्गी लागावीत तसेच नागरिकांना आवश्यक सुविधा उपलब्ध व्हाव्यात,

यासाठी आवश्यक निधी उपलब्ध करून देण्याची मागणी यावेळी करण्यात आली. यावेळी जिल्ह्याच्या विकासासह सामाजिक-राजकीय विषयांवर चर्चा करण्यात आली. या भेटी दरम्यान स्थानिक पातळीवरील प्रश्न, नागरिकांच्या अपेक्षा आणि आगामी काळातील विकासकामांची दिशा याबाबत सकारात्मक विचारविनिमय झाले.

मंत्री महोदयांनी सर्व विषयांवर सकारात्मक प्रतिसाद देत आवश्यक ती कार्यवाही करण्याबाबत आश्वासन दिले. यावेळी भुईंजचे सरपंच विजय वेळे, चेअरमन मदन शिंदे, भिवडीच्या सरपंच तृप्ती चौधरी, पै. मनोज भोसले, शंकर शेलार, संदीप चौधरी, रमेश शेलार, विजय भोसले, विजय इथापे, सागर शिंदे यांच्यासह ग्रामस्थ उपस्थित होते.

विकासाला नवी दिशा मिळण्याची अपेक्षा
वाई-खंडाळा-महाबळेश्वर मतदारसंघातील विविध विकासकामांसाठी निधी उपलब्ध करून देण्याचे आश्वासन मिळाल्याने स्थानिक पातळीवरील प्रलंबित कामांना गती मिळण्याची अपेक्षा आहे. लोकप्रतिनिधी, पदाधिकारी व ग्रामस्थांनी मांडलेल्या प्रश्नांना मंत्री, शिवेंद्रराजे भोसले यांनी सकारात्मक प्रतिसाद दिल्याने मतदारसंघातील विकासासाठी ही भेट महत्त्वपूर्ण ठरणार असल्याची भावना व्यक्त होत आहे.