Chandrakant Khaire : लोकसभा आणि विधानसभा निवडणुकीनतंर राज्यातील सत्ताधारी आणि विरोधी पक्षात सातत्याने आरोप प्रत्यारोप केले जात आहेत. तर दुसरीकडे गेल्या काही दिवसांपासून शिवसेना उद्धव बाळासाहेब ठाकरे पक्षातील अनेक नेते, पदाधिकारी हे शिवसेनेत प्रवेश करताना दिसत आहेत. अशातच आता शिवसेना उद्धव बाळासाहेब ठाकरे पक्षाचे नेते आणि माजी खासदार चंद्रकांत खैरे हे देखील शिवसेनेत जाणार असल्याच्या चर्चा रंगू लागल्या आहेत.

कारण, शिंदे गटाचे नेते आणि सामाजिक न्याय मंत्री संजय शिरसाट यांनी चंद्रकांत खैरेंना ऑफर दिली होती. खैरे यांच्यासाठी आमच्या पक्षाचे दरवाजे नेहमी खुले असतील, असं संजय शिरसाट यांनी म्हटले होते. त्यानंतर काल चंद्रकांत खैरे यांनी शिवसेना ठाकरे गटाच्या मेळाव्याला दांडी मारली. यामुळे राजकीय वर्तुळात चर्चेला उधाण आले आहे. अशातच आता शिंदे गटातील नेत्याने चंद्रकांत खैरेंबद्दल मोठं विधान केले आहे.

शिवसेना शिंदे गटाचे खासदार संदिपान भुमरे यांनी नुकतंच पत्रकारांशी संवाद साधला. ते म्हणाले, खैरे यांच्यासाठी शिवसेना शिंदे गटाची दारे बंद असून, त्यांना कदापिही शिंदे गटात प्रवेश दिला जाणार नाही, असं म्हटलं आहे. भुमरे म्हणाले की, खैरे हे आम्हाला गद्दार म्हणतात, ते एकनिष्ठ आहेत. मग त्यांनी तिकडेच राहावे, त्यांच्यासाठी आमच्या पक्षाची दारे बंदच आहेत, खैरे यांना जनतेने नाकारले असून, त्यांना पक्षात घेण्याचा प्रश्नच नाही, असं भुमरे यांनी म्हटले आहे.

भुमरे हे ढ खासदार, त्यांनी दारू दुकाने सांभाळावी : चंद्रकांत खैरे

चंद्रकांत खैरे यांनी आता घरी बसून नातवंडे सांभाळावीत, असा सल्ला भुमरे यांनी रविवारी दिला होता. तर आज त्यांनी खैरेंसाठी शिवसेनेची दारे बंद असल्याचे जाहीर केले. यावर खैरे यांनी सोमवारी भुमरेंवर निशाणा साधला. मी एकनिष्ठ आहे. मरेपर्यंत पक्ष सोडणार नाही. त्यामुळे मला प्रवेश द्यायचा प्रश्नच येत नाही. मला नातवंडे सांभाळण्याचा सल्ला देत आहेत, त्यांनी आपली दारूची दुकाने सांभाळावीत, खासदार म्हणून ते ढ च असून, त्यांना काहीही येत नाही, असा टोलाही चंद्रकांत खैरे यांनी संदीपान भुमरे याना लगावला.