Shiv Jayanti 2026 – मराठा समाज मंडळाच्या वतीने लोणंद येथे छत्रपती शिवाजी महाराज यांची जयंती मोठ्या उत्साहात साजरी करण्यात आली. सकाळी लोणंद नगरपंचायत येथून शाही मिरवणुकीस प्रारंभ झाला. ढोल-ताशांच्या गजरात ही मिरवणूक काढण्यात आली. पालखीत छत्रपती शिवाजी महाराजांचा पुतळा विराजमान करण्यात आला होता. भगवे झेंडे, घोषणाबाजी आणि पारंपरिक वेशभूषेमुळे संपूर्ण शहरात उत्साहाचे वातावरण निर्माण झाले होते. या मिरवणुकीत युवक, ज्येष्ठ नागरिक तसेच महिलांचीही मोठ्या प्रमाणावर उपस्थिती होती. महिलांनी पारंपरिक पोशाखात सहभाग नोंदवत सोहळ्याची शोभा वाढवली. सायंकाळी ‘शिवचरित्र शोध आणि बोध’ या विषयावर व्याख्याते प्रदीप साळुंखे यांच्या प्रबोधनपर व्याख्यानाचे आयोजन करण्यात आले. कार्यक्रमाच्या अध्यक्षस्थानी नगराध्यक्ष सौ. मधुमती गालींदे होत्या, तर प्रमुख उपस्थिती सहाय्यक पोलीस निरीक्षक शिवाजीराव जायपत्रे यांची होती. मराठा समाज मंडळ लोणंदचे अध्यक्ष विजय कुतवळ, उपाध्यक्ष मयूर निंबाळकर, कृषी उत्पन्न बाजार समितीचे सभापती सुनील शेळके, नगरसेवक रवींद्र क्षीरसागर डॉ. नितीन सावंत,हनुमंतराव शेळके, अॅड. गजेंद्र मुसळे, राजेश शिंदे, दिलीप घाडगे, राहुल घाडगे, अविनाश नलवडे, शंभूराज भोसले, मयूरराज गायकवाड, सुनिल यादव, विशाल जाधव आदी उपस्थित होते. संपूर्ण दिवस देशभक्तीपर वातावरणात आणि शिस्तबद्ध, पारंपरिक पद्धतीने शिवजयंती सोहळा उत्साहात झाला. नगरसेवक रवींद्र क्षीरसागर मित्र मंडळाचा उपक्रम शिवजयंती मिरवणुकीदरम्यान नगरसेवक रवींद्र क्षीरसागर मित्र मंडळाच्या वतीने सहभागी नागरिकांसाठी मोतीचूरचे लाडू व पाण्याच्या बाटल्यांचे वाटप करण्यात आले. मिरवणुकीतील युवक, महिला व ज्येष्ठ नागरिकांनी या उपक्रमाबाबत समाधान व्यक्त केले.
