Shiv Bhojan Thali – राज्यातील गरीब आणि गरजू नागरिकांना सवलतीच्या दरात पोटभर जेवण उपलब्ध करून देण्यासाठी ‘शिवभोजन’ (Shiv Bhojan Thali) योजनेचा शासनाव्दारे 26 जानेवारी 2020 मध्ये या योजनेचा शुभारंभ करण्यात आला होता. महाराष्ट्र राज्यातील गोरगरीब, मजूर, शेतकरी आणि गरीब विद्यार्थी, नागरिकांच्या हिताच्या दृष्टीने शिवभोजन (Shiv Bhojan Thali) योजना 2022 सुरु करण्यात आली.

करोना काळात याची किंमत 5 रुपये करण्यात आली होती. या योजनेमुळे गरिबांना मोठा आधार मिळत होता. मविआ सरकारच्या काळात मुख्यमंत्री उद्धव ठाकरे यांच्या पुढाकाराने ही शिवभोजन थाळी सुरू करण्यात आली होती. शिवभोजन (Shiv Bhojan Thali) थाळीसाठी विविध ठिकाणी केंद्र सुरू करण्यात आली आहेत. ही केंद्र चालवणाऱ्यांना राज्य सरकारकडून विविध मदत दिली जाते.

शिवसेनेकडून सुरु करण्यात आलेल्या या शिवभोजन (Shiv Bhojan Thali) थाळीवर ठाकरे गटाचे प्रमुख उद्धव ठाकरे (Uddhav Thackeray) यांचे फोटो झळकत असल्याचं पाहायला मिळतं. पण आता हेच फोटो हटवण्याची मागणी नागपुरातून केली जात आहे. पंडित दीनदयाळ प्रतिष्ठानने ही मागणी केली असून राज्याचे उपमुख्यमंत्री देवेंद्र फडवणीस (Devendra Fadanvis) यांना या संर्दभात निवदेन देखील देण्यात आले आहे.

राज्यभर असलेल्या शिवजभोजन केंद्रावरुन उद्धव ठाकरे यांचे फोटो हटवण्यात यावे अशी मागणी या प्रतिष्ठानने केली आहे. राज्यभरात अनेक शिवभोजन थाळी केंद्रावरील फलकावर अजून ही माजी मुख्यमंत्री उद्धव ठाकरे यांचे फोटो आहेत. ते तातडीने हटवण्याची मागणी पंडित दीनदयाळ प्रतिष्ठानतर्फे करण्यात आली आहे.

ही योजना महाराष्ट्र शासनाची आहे. त्यामुळे महाराष्ट्र शासनाच्या या योजनेवर विद्यमान मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि अजित पवार यांचे फोटो लावण्यात यावे. तसेच संबंधित जिल्ह्यांच्या पालकमंत्र्यांचे फोटो असणं आवश्यक आहे.

महाराष्ट्रात सत्ता बदल झाल्यानंतरही बऱ्याच ठिकाणी शिवभोजन थाळी केंद्रावर माजी मुख्यमंत्री उद्धव ठाकरे आणि माजी पालकमंत्र्यांचे फोटो लावले आहेत. ते हटवण्याची मागणी सध्या दीनदयाळ प्रतिष्ठानतर्फे करण्यात आली आहे. त्यामुळे येणाऱ्या काळात हे निवेदन गांभीर्याने घेतलं जाणार का? हे पाहणं महत्त्वाचं ठरणार आहे.