Shirur News : पुणे जिल्ह्यातील शिरूर तालुक्यात युरिया खताच्या टंचाईमुळे शेतकऱ्यांची मोठी गैरसोय होत आहे. कृषी केंद्रांवर दिवसभर लांबच लांब रांगा लागत असून, अनेक ठिकाणी रात्री उशिरापर्यंत शेतकऱ्यांना युरियासाठी प्रतीक्षा करावी लागत आहे. (Shirur News)

आमदाबाद येथील एका कृषी केंद्रावर युरिया वाटपादरम्यान शेतकऱ्यांमध्ये वाद निर्माण झाला. परिस्थिती हाताबाहेर जाण्याची शक्यता निर्माण झाल्याने पोलिसांच्या उपस्थितीत वाद मिटवून खताचे वाटप करण्यात आले. (Shirur News)

दरम्यान, तालुक्यातील काही कृषी केंद्रांवर युरियाची साठेबाजी, अवाजवी दराने विक्री आणि इतर महागडी खते किंवा औषधे घेण्याची सक्ती (लिंकिंग) केली जात असल्याचा आरोप शेतकऱ्यांनी केला आहे. काही विक्रेते नियमित ग्राहकांनाच खत देत असून इतर शेतकऱ्यांना खत उपलब्ध असूनही टाळाटाळ करत असल्याचाही आरोप करण्यात आला आहे. (Shirur News)

शेतकऱ्यांच्या म्हणण्यानुसार, काही ठिकाणी खतांचा साठा असतानाही उपलब्ध नसल्याचे सांगितले जाते. तसेच काही कृषी केंद्रांमध्ये खतांच्या शासकीय दरांची यादी प्रदर्शित केली जात नसल्याचाही आरोप आहे. (Shirur News)

काठापूर खुर्द, जांबुत, पिंपरखेड, वडनेर खुर्द, साबळेवाडी, टाकळी हाजी, फाकटे, चांडोह, आमदाबाद, कवठे येमाई, मलठण, शरदवाडी आदी परिसरातील शेतकऱ्यांनी साठेबाजी आणि नियमभंग करणाऱ्या कृषी केंद्रांवर कृषी विभागाने कठोर कारवाई करावी, अशी मागणी केली आहे. (Shirur News)

तसेच, युरियाचा पुरेसा पुरवठा तातडीने उपलब्ध करून द्यावा आणि दोषी आढळणाऱ्या कृषी केंद्रांचे परवाने रद्द करण्याची कारवाई करावी, अन्यथा राज्याचे कृषिमंत्री दत्तात्रय भरणे यांच्याकडे लेखी तक्रार करण्यात येईल, असा इशाराही शेतकऱ्यांनी दिला आहे. (Shirur News)