Gram Panchayat Administrator (शिक्रापूर) : शिरुर तालुक्यातील मुदत संपलेल्या तब्बल ७१ ग्रामपंचायतींवर पुणे जिल्हा परिषदेचे मुख्य कार्यकारी अधिकारी गजानन पाटील यांनी प्रशासक नियुक्तीचे आदेश काढले आहेत. या प्रशासकांमध्ये पंचायत समितीचे विस्ताराधिकारी तसेच अंगणवाडी पर्यवेक्षिकांचा समावेश आहे. विशेष म्हणजे, एका प्रशासकाकडे लांब अंतरावरील सात ते आठ ग्रामपंचायतींचा पदभार देण्यात आला आहे.

प्रशासकांचा कार्यकाळ सहा महिने किंवा ग्रामपंचायत निवडणूक प्रक्रिया पूर्ण होईपर्यंत राहणार आहे. यापूर्वी मुदत संपलेल्या ग्रामपंचायतींवर संबंधित सरपंचांचीच प्रशासक म्हणून नियुक्ती करण्यात आली होती. मात्र, आता नव्याने विस्ताराधिकारी आणि अंगणवाडी पर्यवेक्षिकांची प्रशासक म्हणून नियुक्ती करण्यात आली आहे.

काही प्रशासकांकडे २० ते २५ किलोमीटर अंतरावरील ग्रामपंचायतींची जबाबदारी देण्यात आली आहे. त्यामुळे प्रशासकीय कामांसह प्रत्येक गावाला पुरेसा वेळ देणे कितपत शक्य होईल, याबाबत प्रश्न उपस्थित होत आहे. याचा परिणाम स्थानिक विकासकामे आणि विविध योजनांच्या मंजुरीवर होण्याची शक्यता आहे.

दुसरीकडे, प्रशासक हे शासकीय अधिकारी असल्याने काही कामांसाठी ग्रामस्थांना शासकीय कार्यालयांच्या फेऱ्या माराव्या लागणार नाहीत. मात्र, या नव्या नियुक्त्यांमुळे ग्रामपंचायतींच्या विकासकामांना किती गती मिळणार, याकडे ग्रामस्थांचे लक्ष लागले आहे.

प्रशासक व त्यांच्या ग्रामपंचायती –

विस्ताराधिकारी किसन खोडदे – धामारी, पाबळ, मुखई, हिवरे, गणेगाव खालसा, पिंपळे खालसा.
अंगणवाडी पर्यवेक्षिका गायत्री धावडे – आपटी, वाघाळे.
विस्ताराधिकारी मुकुंद देंडगे – करंदी, केंदूर, निमगाव म्हाळुंगी, वाडा पुनर्वसन, वरुडे.
विस्ताराधिकारी रघुनाथ पवार – आलेगाव पागा, उरळगाव, टाकळी भीमा, दहिवडी, पारोडी, इनामगाव.
अंगणवाडी पर्यवेक्षिका राणी कांबळे– गणेगाव दुमाला, नागरगाव.
अंगणवाडी पर्यवेक्षिका रंजना सोनवणे – सादलगाव.

विस्ताराधिकारी बाळू गावडे – कवठे येमाई, कारेगाव, कोंढापुरी, मलठण, मिडगुलवाडी, कान्हुर मेसाई, सविंदणे, आमदाबाद.
विस्ताराधिकारी रामेश्वर राठोड – कोरेगाव भीमा, डिंग्रजवाडी, पिंपळे जगताप, सणसवाडी, तळेगाव ढमढेरे, वढू बुद्रुक, विठ्ठलवाडी.
विस्ताराधिकारी विष्णू गाडीलकर – आंधळगाव, न्हावरे, शिक्रापूर, गुनाट, निमोणे, वाडगाव रासाई, शिरसगाव काटा.
विस्ताराधिकारी संतोष सोनटक्के – बुरुंजवाडी, कोळगाव डोळस, गोलेगाव, खंडाळे.
विस्ताराधिकारी संभाजी घोडे – चांडोह, निमगाव दुडे, पिंपरखेड, फाकटे, वडनेर खुर्द, रावडेवाडी.
अंगणवाडी पर्यवेक्षिका मीना वायाळ – चिंचणी, बाभूळसर बुद्रुक.

अंगणवाडी पर्यवेक्षिका नंदा पाटोळे – पिंपळसुटी.
अंगणवाडी पर्यवेक्षिका अपर्णा ऊनकुले – मोटेवाडी, शिंदोडी.
विस्ताराधिकारी पूनम मराठे – भांबर्डे, मोराची चिंचोली, निमगाव भोगी, पिंपरी दुमाला, बाभूळसर खुर्द.
विस्ताराधिकारी स्नेहल माकर – जातेगाव बुद्रुक, दरेकरवाडी, जातेगाव खुर्द, कुरुळी, निर्वी.
अंगणवाडी पर्यवेक्षिका पल्लवी देशमुख – खैरेनगर, खैरेवाडी.