Shirur: अवैध धंद्यांविरोधात सुरू असलेल्या आंदोलनाच्या पार्श्वभूमीवर शिरूर तालुक्यात पोलिसांनी अवैध दारूविक्री आणि हातभट्टी निर्मितीविरोधात मोठी संयुक्त कारवाई केली. पुणे ग्रामीणचे पोलीस अधीक्षक संदीपसिंह गिल्ल यांच्या आदेशानुसार शिरूर, रांजणगाव पोलीस ठाणे व स्थानिक गुन्हे शाखेच्या पथकांनी गुरुवारी (दि. २४) सायंकाळपासून रात्री उशिरापर्यंत विविध ठिकाणी छापेमारी करत मोठा साठा जप्त केला. या कारवाईत सहा स्वतंत्र गुन्हे दाखल करण्यात आले आहेत. आंधळगाव येथे सचिन अनिल पवार (२९) याच्याकडून विदेशी व देशी दारूच्या बाटल्या असा सुमारे २१५० रुपयांचा मुद्देमाल जप्त करण्यात आला. आण्णापुर (येवलेमाथा) परिसरात किरण चौगुले व मंगलाबाई चौगुले यांच्या हातभट्टीवर छापा टाकून ४० लिटर कच्चे रसायन, भट्टी साहित्य व ३५ लिटर तयार दारू असा ५६०० रुपयांचा साठा हस्तगत करण्यात आला. पोलिसांची चाहूल लागताच आरोपी पसार झाले. याच परिसरात प्रतिक पवार (२२) याच्याकडून ५ लिटर गावठी दारू जप्त झाली. आंबळे येथे छबु पवार व गणेश पवार यांच्याकडून ३१ लिटर हातभट्टी दारू जप्त करण्यात आली. चांडोह येथे देविदास उर्फ रामदास शिंदे याच्याकडून सुमारे १९,९०० रुपयांची देशी-विदेशी दारू जप्त झाली, तर चांडोह-लाखनगाव भागात भानुदास गाडगे याच्या ताब्यातील ६० लिटर दारू जप्त करून त्याचा शोध सुरू आहे. या सर्व प्रकरणांमध्ये महाराष्ट्र दारूबंदी कायद्यानुसार गुन्हे दाखल करण्यात आले असून पोलीस निरीक्षक संदेश केंजळे यांच्या मार्गदर्शनाखाली कारवाई पार पडली. अवैध दारू व्यवसायाविरोधातील मोहीम अधिक तीव्र करण्यात येणार असल्याचे पोलिसांनी स्पष्ट केले आहे.