प्रभात वृत्तसेवा
शिरूर – दिवाळीचे औचित्य साधून शिरूर तालुक्यातील आगामी जिल्हा परिषद, पंचायत समिती, नगरपरिषद निवडणुकीच्या पार्श्वभूमीवर राजकीय हालचालींना वेग आला आहे. संभाव्य उमेदवारांनी आचारसंहितेपूर्वीच जनतेशी संवाद साधत मिठाई आणि भेटवस्तूंसह शुभेच्छा देऊन भेटीगाठींचा कार्यक्रम राबवला आहे. निवडणुकीच्या रिंगणात उतरणाऱ्या इच्छुकांनी दीपावलीचा मुहूर्त साधला आहे. यातून इच्छुकांनी थेट मतदारांशी संवाद साधला आहे. त्यामुळे दीपोत्सवात राजकारणालाही नवा वेग आला आहे.

शिरूर तालुक्यात ७ जिल्हा परिषद गट आणि १४ पंचायत समिती गण आहेत. त्यातील संवेदनशील म्हणून ओळखल्या जाणाऱ्या गटाकडे शिरूर- आंबेगाव तालुक्याचे लक्ष लागले आहे. जिल्हा परिषदेच्या तीन गटांत सर्वसाधारण खुल्या प्रवर्गात लढती होणार असल्याने चुरस निर्माण झाली आहे. इच्छुकांच्या भेटीगाठींमधून येणाऱ्या स्थानिक निवडणुकीच्या पार्श्वभूमीवर संवाद साधला जात असून कार्यकर्त्यांमध्ये उत्साहाचे वातावरण निर्माण झाले आहे.

शिरूर शहरासह तालुक्यात वेगवेगळ्या ठिकाणी झालेल्या शुभेच्छा मेळाव्यांना व्यापारी, सामाजिक कार्यकर्ते आणि नागरिकांची मोठी उपस्थिती लाभली आहे. काही ठिकाणी सांस्कृतिक कार्यक्रम आणि दिवाळी फराळ मेळावे साजरे करण्यात आले. अनेक इच्छुक नेत्यांनी आपल्या मतदारसंघातील विकासकामांबाबत नागरिकांना माहिती दिली. दिवाळीचा गोडवा आणि राजकीय मोर्चे बांधणी असा दोन्हींचा संगम तालुक्यात पाहायला मिळत आहे.

दिलीप वळसे यांच्याकडून संवादाचा सेतू..
आंबेगाव विधानसभा मतदारसंघात शिरूर तालुक्यातील ३९ गावे समाविष्ट असल्याने टाकळी हाजी- कवठे येमाई गटातील राजकीय नेते, पदाधिकारी, कार्यकर्त्यांचा घरोबा हा आंबेगाव तालुक्यात आहे. या बेट भागात माजी मंत्री दिलीप वळसे पाटील यांच्या राष्ट्रवादीची फळी मजबूत आहे. तगडे, प्रस्थापित नेते असल्याने राजकारणातील ज्वालामुखीचे केंद्र म्हणून बेट भागाची ओळख आहे. नेहमीच सतर्क, वैचारिक बांधिलकी जपणारा मतदार आहे.

याची प्रचिती लोकसभा, विधानसभा निवडणुकीत आली आहे. त्यावेळी राष्ट्रवादी अजित पवार गटाची पीछेहाट झाली असली तरी माजी मंत्री दिलीप वळसे पाटील यांनी शिरूर तालुक्यातील गावागावांत संवादाचा सेतू भक्कम केला आहे. बेट भागातील राष्ट्रवादी अजित पवार गटाची फळी सक्रिय झाली आहे. त्यामुळे बेट भागात हवा तापली आहे.

तीन गटांत सौभाग्यवती रिंगणात..
शिरूर ग्रामीण- न्हावरे (नागरिकांचा मागास प्रवर्ग महिला आरक्षित गट), वडगाव रासाई- मांडवगण फराटा (नागरिकांचा मागास प्रवर्ग सर्वसाधारण आरक्षित गट), तळेगाव ढमढेरे- रांजणगाव सांडस, शिक्रापूर- सणसवाडी, रांजणगाव गणपती- कारेगाव (सर्वसाधारण प्रवर्ग, महिला), टाकळी हाजी- कवठे येमाई, पाबळ- केंदूर (सर्वसाधारण) जिल्हा परिषद गटातील तीन लढती लक्षवेधी होणार आहेत. यातील तळेगाव, शिक्रापूर, रांजणगाव गटात महिलाराज असल्याने इच्छुक उमेदवारांची संधी हुकल्याने त्यांनी सौभाग्यवतींना रिंगणात उतरविणार आहेत. शिरूर तालुक्यात ७ पैकी ६ गटांत चुरशीच्या लढती होणार आहेत.