Shirur News : शिरूर तालुक्यातील डिंग्रजवाडी परिसरात गेल्या काही दिवसांपासून नागरिकांना वारंवार (Shirur News) दर्शन देत दहशत निर्माण करणारा बिबट्या अखेर वनविभागाने लावलेल्या पिंजऱ्यात जेरबंद करण्यात यश आले आहे.

बिबट्याने परिसरातील पशुधन तसेच कुत्र्यांवर हल्ले केल्याने नागरिकांमध्ये भीतीचे वातावरण निर्माण झाले होते. बिबट्या जेरबंद झाल्याने डिंग्रजवाडी परिसरातील नागरिकांनी सुटकेचा नि:श्वास सोडला आहे.

डिंग्रजवाडी परिसरातील खडावस्ती भागात गेल्या काही दिवसांपासून बिबट्याचा वावर वाढला होता. रात्रीच्या वेळी तसेच पहाटेच्या सुमारास बिबट्याचे नागरिकांना वारंवार दर्शन होत होते. याशिवाय बिबट्याने काही पशुधनांसह कुत्र्यांवरही हल्ले केल्याने शेतकरी व नागरिकांमध्ये भीतीचे वातावरण होते.

त्यामुळे बिबट्याचा बंदोबस्त करण्यासाठी जिल्हा परिषद सदस्या दिपाली गव्हाणे व सरपंच प्रसाद गव्हाणे यांनी वनविभागाकडे सातत्याने पाठपुरावा केल्यानंतर वनविभागाने खडावस्ती परिसरात पिंजरा लावला होता.

अखेर बुधवारी (दि. २) सकाळच्या सुमारास बिबट्या या पिंजऱ्यात अडकला. बिबट्या पिंजऱ्यात जेरबंद झाल्याची माहिती परिसरात वाऱ्यासारखी पसरताच नागरिकांनी घटनास्थळी मोठी गर्दी केली.

या घटनेची माहिती मिळताच वनपरिक्षेत्र (Shirur News) अधिकारी निळकंठ गव्हाणे व वनपरिमंडळ अधिकारी रुपावली जगताप यांच्या मार्गदर्शनाखाली शिरूर वनविभागाचे नियतक्षेत्र अधिकारी सोपान अनासुने, पूनम जाधव, वनमजूर आनंदा हरगुडे तसेच वनविभागाच्या रेस्क्यू टीमचे शेरखान शेख, श्रीकांत भाडळे, सुरेश जाधव व परमेश्वर दासरे यांनी घटनास्थळी धाव घेत बिबट्याला सुरक्षितपणे ताब्यात घेतले.

जेरबंद करण्यात आलेला बिबट्या नर जातीचा असून पूर्ण वाढ झालेला असल्याचे वनविभागाने सांगितले. त्याला सुरक्षितपणे पिंजऱ्यातून बाहेर काढून पुढील उपचार व देखरेखीसाठी माणिकडोह बिबट निवारण केंद्रात हलविण्यात आले आहे. दरम्यान, बिबट्या जेरबंद झाल्याने डिंग्रजवाडी परिसरातील नागरिकांनी वनविभागाच्या कारवाईचे स्वागत केले असून, गेल्या काही दिवसांपासून असलेली भीती कमी झाल्याचे नागरिकांनी सांगितले.

मात्र परिसरात आणखी बिबट्यांचा वावर आहे का, याची वनविभागाने (Shirur News) पाहणी करून आवश्यक उपाययोजना कराव्यात, अशी अपेक्षाही नागरिकांनी व्यक्त केली आहे.यावेळी पोलीस पाटील साईनाथ गव्हाणे, चेअरमन प्रवीण गव्हाणे, उद्योजक सागर गव्हाणे, अजय गव्हाणे, बळीराम गव्हाणे, हनुमंत गव्हाणे, संतोष गव्हाणे यांच्यासह परिसरातील नागरिक उपस्थित होते.