Shirur News : पुणे–अहिल्यानगर राष्ट्रीय महामार्ग क्रमांक ७५३ (एफ) वरील शिरूर शहराच्या (Shirur News) हद्दीत रात्रीच्या अंधारात नेमकं काय घडलं, याचा उलगडा आता पोलिसांच्या कारवाईतून सुरू झाला आहे. रस्त्याच्या मधोमध असलेले मजबूत आरसीसी व काँक्रीटचे डिव्हायडर तब्बल सात ठिकाणी तोडून स्वतःच्या सोयीसाठी अनधिकृत कट तयार करण्यात आल्याचा गंभीर प्रकार समोर आला आहे.

सी. टी. बोरा कॉलेज ते बाबुरावनगर अंडरपासचा वरील भाग, कोळपे हॉस्पिटल, गंगा कार डेकोर, संग्राम हॉटेल, बोऱ्हाडे मळ्यातील गणेश मंदिर, सरदवाडी येथील महिंद्रा शोरूमसमोरील घावटे मळा रस्ता आणि हिंदुस्तान पेट्रोल पंप परिसर अशा संवेदनशील ठिकाणी हे डिव्हायडर (Shirur News) फोडण्यात आले होते.

भरधाव वेगात जाणाऱ्या महामार्गावर या अनधिकृत कटमधून अचानक वाहने वळवली जात असल्याने दररोज मोठ्या अपघाताचा धोका निर्माण झाला होता. वाहनचालकांच्या जिवाशी सुरू असलेल्या या जीवघेण्या खेळाविरोधात सामाजिक कार्यकर्ते निलेश वाळुंज यांनी तीव्र आंदोलन छेडून प्रशासनाचे लक्ष वेधले होते. या आंदोलनाची दखल घेत अखेर शिरूर पोलिसांनी घटनास्थळांची पाहणी केली आणि अज्ञात व्यक्तींविरुद्ध थेट गुन्हा दाखल केला.

पोलीस कॉन्स्टेबल शेखर झाडबुके यांच्या फिर्यादीवरून शिरूर पोलीस ठाण्यात गुन्हा रजि. नं. ७५८/२०२६ अन्वये भारतीय न्याय संहिता कलम ३२६(ब), १२५ सह सार्वजनिक मालमत्ता नुकसान प्रतिबंधक कायदा व राष्ट्रीय महामार्ग कायद्यान्वये गुन्हा नोंदवण्यात आला आहे.

हे डिव्हायडर नेमके कोणी फोडले, त्यासाठी कोणती यंत्रसामग्री वापरली आणि यामागे कोणाचे हितसंबंध गुंतले होते, याचा शोध पोलीस हवालदार वाघमोडे करत आहेत. परिसरातील सीसीटीव्ही फुटेज आणि स्थानिक व्यावसायिकांच्या कॅमेऱ्यांची तपासणी सुरू असून आता हे अनधिकृत कट कायमस्वरूपी कधी बंद होणार, याकडे सर्वांचे (Shirur News) लक्ष लागले आहे.