Shirur Crime : शिरूर शहरातील चेतक शोरूममधून भरदिवसा इलेक्ट्रिक स्कूटी चोरीला गेल्याची घटना उघडकीस आली होती. या प्रकरणाचा समांतर तपास करणाऱ्या स्थानिक गुन्हे शाखेच्या पथकाने आरोपीला अटक करून त्याच्याकडून तब्बल १ लाख ५७ हजार १४० रुपये किमतीची चेतक ई-स्कूटी (C3501) हस्तगत केली.

या प्रकरणी शिरूर पोलीस ठाण्यात २० ऑगस्ट रोजी गुन्हा दाखल करण्यात आला होता. स्थानिक गुन्हे शाखेकडून या गुन्ह्याचा समांतर तपास सुरू होता.

तपासादरम्यान पोलिसांनी परिसरातील सीसीटीव्ही फुटेजची तपासणी केली. तसेच गोपनीय बातमीदाराकडून मिळालेल्या माहितीतून सुनील सुरेश घावटे (वय ३४, रा. बोऱ्हाडे मळा, ता. शिरूर, जि. पुणे) याचा चोरीच्या गुन्ह्यात सहभाग असल्याचे समोर आले.

त्यानंतर पोलिसांनी घावटे याला ताब्यात घेऊन चौकशी केली. चौकशीदरम्यान त्याने गुन्ह्याची कबुली दिल्याचे पोलिसांनी सांगितले. त्याच्याकडून चोरीला गेलेली चेतक इलेक्ट्रिक स्कूटी हस्तगत करण्यात आली असून, आरोपीला पुढील तपासासाठी शिरूर पोलिसांच्या ताब्यात देण्यात आले आहे.

ही कारवाई पुणे ग्रामीणचे पोलीस अधीक्षक संदीप सिंह गिल्ल, अपर पोलीस अधीक्षक शुभम कुमार आणि स्थानिक गुन्हे शाखेचे पोलीस निरीक्षक प्रमोद क्षीरसागर यांच्या मार्गदर्शनाखाली पोलीस उपनिरीक्षक महेश डोंगरे, सहायक पोलीस फौजदार संजय पड्याळ, पोलीस हवालदार तुषार पंदारे, जनार्दन शेळके, संजू जाधव, राजू मोमीन, विकास पाटील तसेच पोलीस अंमलदार सागर धुमाळ यांच्या पथकाने केली.