Shirur News- शिरूर तालुक्यात गेल्या काही वर्षांत झपाट्याने वाढत असलेल्या शहरीकरणाच्या पार्श्वभूमीवर अवैध गुंठेवारी, अनधिकृत प्लॉटिंग आणि बांधकामांचा प्रश्न गंभीर बनला आहे. अनेक ठिकाणी नियमबाह्य पद्धतीने जमिनींचे तुकडे करून प्लॉट विक्री केली जात असल्याच्या तक्रारी आहेत. त्यानंतर उभारण्यात येणाऱ्या बांधकामांना आवश्यक नागरी सुविधा पुरवण्याची जबाबदारी ग्रामपंचायतींवर येत आहे.

मात्र, नियोजनाविना वाढणाऱ्या वस्त्यांमुळे ग्रामपंचायतींच्या उपलब्ध यंत्रणेवर मोठा ताण पडत आहे. पुणे – नगर महामार्गालगत तसेच तालुक्यातील प्रमुख गावांच्या हद्दीत झपाट्याने लोकवस्ती वाढत असताना रस्ते, पाणी, सांडपाणी, कचरा व्यवस्थापन, वीज, आरोग्य सुविधा यांचे नियोजन मात्र त्या प्रमाणात होत नसल्याचे चित्र आहे. त्यामुळे आज निर्माण झालेली अनियोजित वस्ती उद्या प्रशासनासाठी मोठे आव्हान ठरण्याची शक्यता आहे.

अवैध गुंठेवारी आणि अनधिकृत बांधकामांवर कारवाई करण्याची जबाबदारी संबंधित प्रशासनाची असतानाही प्रत्यक्षात अनेक ठिकाणी नियमांची पायमल्ली सुरू असल्याचा आरोप नागरिकांकडून होत आहे. जमिनींचे तुकडे पाडून विक्री, अंतर्गत रस्त्यांचे अपुरे नियोजन, पावसाच्या पाण्याचा निचरा करण्याची व्यवस्था नसणे, भविष्यातील पाणीपुरवठ्याचा विचार न करता वस्त्या उभ्या राहणे, या बाबींकडे वेळीच लक्ष देण्याची मागणी होत आहे.

अनधिकृत अथवा अपुऱ्या नियोजनातून निर्माण झालेल्या वस्त्यांमध्ये नागरिक वास्तव्यास आल्यानंतर पाणी, कचरा संकलन, रस्ते, इतर मूलभूत सुविधांची मागणी ग्रामपंचायतींकडे केली जाते. मात्र, उपलब्ध मनुष्यबळ, निधी, पायाभूत सुविधा मर्यादित असल्याने ग्रामपंचायतींची अक्षरशः कोंडी होत आहे. त्यामुळे अनधिकृत वसाहती निर्माण होण्यापूर्वीच त्यावर नियंत्रण आणणे गरजेचे आहे, अशी मागणी नागरिकांमधून होत आहे.

दरम्यान, पुणे – नगर महामार्गालगत अनेक ठिकाणी कचरा टाकला जात असल्याने परिसराचे विद्रूपीकरण होत आहे. महामार्गालगत कचऱ्याचे ढीग, प्लास्टिक आणि इतर घनकचरा पडून राहिल्याने दुर्गंधी आणि अस्वच्छतेचा प्रश्न निर्माण होत आहे. वाढती लोकवस्ती आणि व्यावसायिक आस्थापनांच्या तुलनेत ग्रामपंचायतीकडे कचरा व्यवस्थापनाची यंत्रणा सक्षम नसल्यास परिस्थिती आणखी गंभीर होण्याची शक्यता आहे.

पाऊस संपताच पाण्यासाठी वणवण?
शिरूर तालुक्यातील काही भागांमध्ये वाढत्या बांधकामांमुळे भूजलावर वाढता ताण येत असल्याची चिंता व्यक्त होत आहे. पावसाळ्यात पाण्याची उपलब्धता चांगली दिसत असली तरी पावसाळा संपल्यानंतर अनेक गावांना पुन्हा पाणीटंचाईला सामोरे जावे लागण्याची शक्यता आहे. अनियोजित बांधकामे, वाढती लोकसंख्या आणि भूजलाचा वाढता वापर यामुळे भविष्यातील पाणीप्रश्न अधिक गंभीर होऊ शकतो.