Shirur News : मराठा आरक्षणाच्या हक्कासाठी मनोज जरांगे यांच्या उपोषणाचा १३ वा दिवस उजाडला आणि त्याचे तीव्र पडसाद (Shirur News) थेट रस्त्यावर उमटले. शिरूर शहरातील पुणे-अहिल्यानगर महामार्गावरील पाबळ फाटा येथे अचानक समाजबांधवांचा मोठा जमाव दाखल झाला आणि पाहता पाहता संपूर्ण परिसर भगवे वादळ उठल्यासारखा दिसू लागला.

‘आरक्षण आमच्या हक्काचं, नाही कुणाच्या बापाचं’, ‘मनोजदादा तुम आगे बढो, हम तुम्हारे साथ है’ आणि ‘छत्रपती शिवाजी महाराज की जय’ अशा गगनभेदी घोषणांनी परिसर दणाणून गेला. दुपारच्या कडक उन्हाची तमा न बाळगता महिला आणि तरुणांनी थेट रस्त्यावर ठिय्या मांडला, तर सामाजिक कार्यकर्ते सावळेराम आवारी यांनी भर उन्हात रस्त्यावर झोपून सरकारचा अनोख्या पद्धतीने निषेध नोंदवला.

सुमारे तासाभराहून अधिक काळ हा महामार्ग पूर्णपणे रोखून धरल्यामुळे दोन्ही बाजूंची वाहतूक ठप्प झाली होती. आंदोलनाचे गांभीर्य लक्षात येताच पोलिसांनी तातडीने धाव घेत पर्यायी मार्गाने वाहतूक सुरळीत करण्याचे प्रयत्न (Shirur News) सुरू केले. या आंदोलनात लहूजी शक्ती सेना आणि मातंग एकता आंदोलनानेही जाहीर पाठिंबा देत दादाभाऊ लोखंडे व विशाल जोगदंड यांच्यामार्फत पाठिंब्याचे पत्र दिले.

जरांगे पाटील समाजासाठी उपोषण करत असताना आपण गप्प बसू शकत नाही, म्हणूनच सरकारचे डोळे उघडण्यासाठी हा रास्ता रोको करण्यात आल्याचे आंदोलकांनी सांगितले. हे केवळ प्रतीकात्मक आंदोलन असून शासनाने तातडीने निर्णय न घेतल्यास संपूर्ण पुणे-नगर महामार्ग बेमुदत रोखला जाईल, असा सज्जड इशाराही यावेळी देण्यात आला.

मराठा समाजाच्या सहनशीलतेचा अंत पाहू नये, अन्यथा उद्रेक होईल अशा संतप्त भावना आंदोलकांनी व्यक्त केल्या. आंदोलनानंतर पोलीस निरीक्षक विनोद पाटील आणि निवासी नायब तहसीलदार स्नेहा गिरीगोसावी यांना आरक्षणाच्या तातडीच्या मागणीचे निवेदन सोपवण्यात आले.

या तीव्र आंदोलनात (Shirur News) नगरसेवक अभिजीत पाचर्णे, सुनील जाधव, सागर नरवडे, उमेश शेळके, नीलेश गाडेकर, अविनाश घोगरे, रामभाऊ शेटे, बबन महाराज थोरात, वैशाली गायकवाड, हरिभाऊ वीर, प्रा. सतीश धुमाळ, रमेश दसगुडे यांच्यासह परिसरातील नागरिक, महिला व तरुण मोठ्या संख्येने सहभागी झाले होते.