Shirur News – शिरूर तालुक्यातील मलठण ते शिक्रापूर या महत्त्वाच्या रस्त्याची सध्या अत्यंत दयनीय अवस्था झाली असून, कंत्राटदाराच्या निष्काळजीपणामुळे नागरिक आणि वाहनचालकांना मोठ्या संकटाचा सामना करावा लागत आहे. नियमानुसार एका बाजूचे काम पूर्ण करून दुसरी बाजू खोदणे आवश्यक असताना, कंत्राटदाराने दोन्ही लेन एकाच वेळी उकरून ठेवल्या आहेत. या नियमबाह्य कामामुळे संपूर्ण रस्ता खड्डेमय झाला असून, या मार्गावरून प्रवास करणे जीवघेणे ठरत आहे. हा रस्ता परिसरातील अनेक गावांना जोडणारा मुख्य मार्ग असल्याने येथून दररोज शेकडो वाहनांची ये-जा सुरू असते. मात्र, दोन्ही बाजू रस्ते उकरल्याने वाहनचालकांना मार्ग काढणे कठीण झाले आहे. उखडलेली माती, खडी आणि मोठमोठ्या खड्ड्यांमुळे दुचाकी घसरून अनेक छोटे-मोठे अपघात घडत आहेत, ज्यात काही नागरिक जखमी झाले आहेत. रात्रीच्या वेळी प्रकाश व्यवस्था नसल्याने हा धोका अधिकच वाढला असून प्रवाशांमध्ये भीतीचे वातावरण आहे. शेतकऱ्यांना आपला शेतीमाल नेण्यासाठी ट्रॅक्टर आणि इतर वाहने चालवताना अडथळे येत असल्याने त्यांचा आर्थिक फटका बसत आहे. तसेच विद्यार्थ्यांना शाळा-महाविद्यालयात पोहोचण्यासाठी विलंब होत आहे. सार्वजनिक बांधकाम विभागाचे या कामाकडे दुर्लक्ष असून कंत्राटदारावर कोणाचेही नियंत्रण नसल्याचा आरोप ग्रामस्थांनी केला आहे. संबंधित विभागाने तातडीने याकडे लक्ष देऊन काम पूर्ण करावे, अन्यथा तीव्र आंदोलन छेडण्याचा इशारा स्थानिक नागरिकांनी दिला आहे.
