Pune News : पुणे जिल्ह्यातील शिरूर (घोडनदी) येथील घरकुल योजनेअंतर्गत लाभार्थ्यांच्या घरांचे भोगवटादार वर्ग-२ मधून वर्ग-१ मध्ये रूपांतर करण्याची प्रक्रिया गतीने पूर्ण करून पात्र नागरिकांना लवकरात लवकर दिलासा द्यावा. त्यासाठी विशेष शिबिरांचे आयोजन करून सर्व पात्र प्रकरणे विहित कालावधीत निकाली काढावीत, असे निर्देश महसूल मंत्री चंद्रशेखर बावनकुळे यांनी दिले. (Pune News)

यासंदर्भातील आढावा बैठक आज मंत्रालयात पार पडली. बैठकीत पुणे महापौर मंजुषा नागपुरे यांनी शिरूर (घोडनदी) येथील घरकुल योजनेतील लाभार्थ्यांच्या प्रलंबित प्रश्नांकडे लक्ष वेधले. या योजनेअंतर्गत १,९७१ निवासी भूखंड असून योजना सुरू होऊन ३६ वर्षे उलटून गेल्याने भोगवटादार वर्ग-१ मध्ये रूपांतराची प्रक्रिया पूर्ण करण्याची मागणी त्यांनी केली. (Pune News)

यावेळी महसूल मंत्री बावनकुळे यांनी सांगितले की, शासनाच्या विद्यमान तरतुदीनुसार रेडीरेकनर दराच्या १५ टक्के रक्कमेचा भरणा केल्यानंतर भोगवटादार वर्ग-१ मध्ये रूपांतराची कार्यवाही करता येते. या संदर्भातील अधिकार जिल्हाधिकाऱ्यांकडे असून, प्राप्त झालेल्या पाच अर्जांवरील कार्यवाही सोमवारपर्यंत पूर्ण करावी, असे निर्देश त्यांनी दिले. (Pune News)

तसेच उर्वरित पात्र लाभार्थ्यांची प्रकरणेही प्रलंबित राहू नयेत, यासाठी विशेष शिबिरांचे आयोजन करून वर्ग-२ मधून वर्ग-१ मध्ये रूपांतराची संपूर्ण प्रक्रिया वेळेत पूर्ण करण्याच्या सूचनाही महसूल मंत्री बावनकुळे यांनी अधिकाऱ्यांना दिल्या. या बैठकीस पुणे महापौर मंजुषा नागपुरे, पुणे जिल्हाधिकारी जितेंद्र डुडी दूरदृश्य प्रणालीद्वारे उपस्थित होते. (Pune News)

Chandrashekhar Bawankule: मोजणीसाठी तब्बल ‘इतके’ महिने वेटिंग; महसूलमंत्र्यांनी विधानसभेत दिली धक्कादायक कबुली

Chandrashekhar Bawankule : मेळघाटमध्ये आदिवासींना प्रभावी आरोग्य सुविधा पुरवावी; मंत्री चंद्रशेखर बावनकुळे यांचे निर्देश