Shirur News : फाकटे (ता. शिरूर) येथे दोन दिवसांपूर्वी मध्यरात्री अचानक लागलेल्या भीषण आगीत सुनिल सूर्यवंशी यांचे संपूर्ण घर क्षणार्धात जळून खाक झाले. या दुर्घटनेत घरातील संसारोपयोगी साहित्य, कपडे, धान्य, महत्त्वाची कागदपत्रे आदी सर्व वस्तू पूर्णतः नष्ट झाल्याने सूर्यवंशी कुटुंब उघड्यावर आले. घटनेची माहिती मिळताच ग्रामस्थांसह विविध पक्षांचे पदाधिकारी मदतीसाठी धावून आले. पुणे जिल्हा परिषदेचे सदस्य राजेंद्र गावडे तसेच टाकळी हाजीचे माजी सरपंच दामू घोडे यांनी घटनास्थळी भेट देत कुटुंबीयांना धीर दिला. राजेंद्र गावडे यांनी सूर्यवंशी कुटुंबासाठी नव्याने पत्राशेड स्वरूपाचे घर उभारण्यासाठी पत्रे, पाईप व इतर आवश्यक साहित्य उपलब्ध करून दिले. तर दामू घोडे यांनी संपूर्ण संसारोपयोगी साहित्य आणि कपड्यांची मदत केली. याशिवाय सामाजिक कार्यकर्ते शंकर पिंगळे, उद्योजक दिलीप सोदक, बाळासाहेब पठारे, संतोष हिलाळ, बाळासाहेब राळे, दादाभाऊ पानमंद, वाल्मिक आंद्रे, लहू गावडे तसेच ग्रामस्थांनी जीवनावश्यक वस्तू, गॅस शेगडी, किराणा, धान्य व कपडे देत कुटुंबाला आधार दिला. या संकटाच्या काळात ग्रामस्थांनी एकजूट दाखवत सामाजिक बांधिलकी जपली असून, सूर्यवंशी कुटुंबाला पुन्हा नव्याने उभे राहण्यासाठी मदतीचा भक्कम हात दिल्याचे चित्र पाहायला मिळत आहे.
