प्रभात वृत्तसेवा शिरूर – मनसेचे शिरूर तालुका संघटक अविनाश सुरेश घोगरे यांनी उपमुख्यमंत्री अजित पवार यांच्या उपस्थितीत राष्ट्रवादी काँग्रेसमध्ये जाहीर प्रवेश केला. प्रवेशासोबतच पक्षाने त्यांच्यावर विश्वास दाखवत शिरूर शहरातील प्रभाग क्रमांक १२ (हूडको वसाहत) येथून त्यांना उमेदवारी जाहीर केलेली आहे. हूडको वसाहतीतील अनेक नागरिकांची घरे आजतागायत त्यांच्या नावावर झाली नसल्याने निर्माण झालेल्या समस्यांवर उपाय म्हणून उपमुख्यमंत्री अजित पवार यांनी नागरिकांची घरे त्यांच्या नावावर करण्यासाठी शासन स्तरावर ठोस प्रयत्न करणार असल्याची ग्वाही शिरूर येथील पाच कंदील चौकात झालेल्या जाहीर सभेत दिली.यासाठी स्वतः अजित पवार व आमदार माऊली कटके यांच्या माध्यमातून वेगवान पाठपुरावा होणार असल्याचे व हूडको वसाहतीच्या सर्वांगीण विकासासाठी मी सदैव कटिबद्ध राहणार असल्याचे उमेदवार अविनाश घोगरे यांनी सांगितले. प्रभागातील प्रत्येक नागरिकांपर्यंत विकासाचा अजेंडा घेऊन सुरू असलेल्या त्यांच्या प्रभावी प्रचाराने घोगरे यांच्या उमेदवारीला चांगला प्रतिसाद मिळत असून, परिसरात त्यांच्या उमेदवारीचे कौतुक होत आहे. हूडकोवासीयांची वर्षानुवर्षे प्रलंबित असलेली ‘हक्काची घरे’ मिळण्याची स्वप्ने आता लवकरच पूर्णत्वास जाणार असल्याची चिन्हे दिसत असून, नागरिकांमध्ये नव्या आशेचा किरण उगवला आहे. सर्वसामान्यांच्या हक्कासाठी लढणारा तरूण सामाजिक कार्यात सदैव पुढाकार घेणारे घोगरे यांनी अवाजवी वीज बिलांविरोधातील आंदोलन, तसेच शासकीय कार्यालयातील कामे वेळेत मार्गी लावण्यासाठी केलेली उपोषणे, आंदोलने याद्वारे घोगरे यांनी स्वतःची ठसठशीत ओळख निर्माण केली आहे. सर्वसामान्यांच्या हक्कासाठी लढणारा जमिनीवरचा तरूण कार्यकर्ता म्हणून त्यांच्याकडे पाहिले जाते. यापार्श्वभूमीवर राष्ट्रवादी काँग्रेसने दिलेली उमेदवारी केवळ योग्यच नव्हे, तर नागरिकांच्या अपेक्षांची पूर्तता करणारी ठरत असल्याचे राजकीय वर्तुळात म्हटले जात आहे.
