– अरुणकुमार मोटे
Shirur Crime- शांत, कृषिप्रधान, व्यावसायिक आणि सामाजिक सलोख्यासाठी ओळखल्या जाणाऱ्या शिरूर तालुक्याची ओळख आता वाढत्या गुन्हेगारीमुळे बदलत चालली आहे. शिरूर शहरासह तालुक्यातील सामाजिक वातावरण बिघडल्यामुळे सरकारी अधिकाऱ्यांसह बडे उद्योजक शिरूरमध्ये आपल्या मुलांना शिक्षण व कुटुंबासह राहण्यास नकार देत आहेत. अवघ्या सहा महिन्यांत गोळीबाराच्या पाच घटना घडल्या.

वाढती गुन्हेगारी, ड्रग्जचा विळखा, दहशत, ठेकेदारीतून वर्चस्वाची लढाई, आदी कारणातून विळखा घातला आहे. त्यात अधिकाऱ्यांना लाचेचा लळा लागल्याने झारीतील शुक्राचार्यामुळे प्रशासन बदनामीच्या उंबरठ्यावर आहे. एका घटनेत तरुणावर गंभीर हल्ला झाला, तर अन्य घटनेत तरुणाने जीव वाचविण्यासाठी तलावात उडी घेतल्याचे समोर आले आहे. किरकोळ वाद, प्रेमप्रकरणे,

टोळीयुद्ध आणि आर्थिक व्यवहारांमधून थेट बंदुकीचा वापर होऊ लागल्याने शिरूर तालुक्यातील कायदा-सुव्यवस्थेवर गंभीर प्रश्नचिन्ह निर्माण झाले आहे. पोलीस ठाण्याच्या हद्दीत अवैध व्यवसायांनी चांगलाच उच्छाद मांडला असून आर्थिक पाठबळामुळे अवैध व्यवसायिक चांगलेच स्तोम माजले आहे. अति हव्यासापोटी टाकळी हाजी आऊट पोस्टमध्ये दोन दिवसांपूर्वी दोन लाचखोर हवालदारांना लाच घेताना रंगेहात पकडले आहे.

एक हवालदार अवैध धंद्यांची वसुली करीत असून अवैध धंद्यावाल्यांबरोबर औटपोस्टमध्ये पार्टी झोडत आहे, अशी चर्चा सुरू झाली आहे. शिरूर शहरासह तालुक्यात मॅफेड्रॉन, गांजा या अमली पदार्थांची विक्री होत असून तरुणाई नशेमध्ये झिंगली आहे. बेट भागातील पंचतळे येथे अवैध दारू व्यवसाय जोरात सुरु असून तरुणाई आर्थिक अडचणी सापडली जात आहे. पूर्वी वाद झाल्यानंतर तो चर्चेत, मारामारीत किंवा गावपातळीवरील मध्यस्थीतून मिटविला जात होता.

मात्र, आता किरकोळ वादाचा शेवट थेट गोळीबारात होऊ लागला आहे. त्यामुळे गुन्हेगारीचे स्वरूप अधिक गंभीर आणि चिंताजनक झाले आहे. सहा महिन्यांतील घटनांकडे पाहिले असता गोळीबार हा अपवाद राहिलेला नसून तो गुन्हेगारीतील वाढत्या हिंसक प्रवृत्तीचा संकेत ठरत आहे. विशेषतः तरुणांचा सहभाग, अल्पवयीन मुलांपर्यंत गुन्हेगारीचे लोण पोहोचत असल्याच्या घटनांमुळे पालक, नागरिक, पोलीस यंत्रणेची चिंता वाढली आहे.

दोन दिवसांत ‘जामीन’च्या चर्चेने धाक कमी?
अवैध शस्त्र बाळगणे, त्याचा वापर करणे किंवा गुन्ह्यांमध्ये शस्त्राचा धाक दाखविणे या घटनांकडे गांभीर्याने पाहण्याची गरज आहे. काही प्रकरणांत आरोपींना लवकर जामीन मिळाल्याची चर्चा नागरिकांमध्ये होत असल्याने गुन्हेगारांच्या मनात कायद्याचा धाक किती आहे, यावरही प्रश्न उपस्थित होत आहेत. शस्त्र बाळगणे आणि त्याचा वापर करण्याची प्रवृत्ती रोखण्यासाठी केवळ घटना घडल्यानंतरची कारवाई पुरेशी ठरणार नाही.