Shikrapur News – शिक्रापूर (ता. शिरुर) येथील ट्रिनीटी इंडिया फोर्जटेक प्रायवेट लिमिटेडच्या कामगारांनी वेतनवाढ व कामगारांच्या विविध मागण्यांसाठी राष्ट्रवादी काँग्रेस कामगार सेल प्रणित शिवगर्जना कामगार संघटनेच्या माध्यमातून कंपनीच्या गेटवर बेमुदत संप सुरु केला आहे. शिक्रापूर येथील ट्रिनीटी इंडिया फोर्जटेक प्रा. लिमिटेडच्या कामगारांनी कामगारांच्या वेतनवाढ बाबतचे निवेदन कंपनी व्यवस्थापकांना दिले होते.

कंपनीकडून कामगारांना सकारात्मक प्रतिसाद मिळाला नसल्याने कामगारांनी वेतनवाढ व कामगारांच्या विविध मागण्यांसाठी राष्ट्रवादी काँग्रेस कामगार सेल प्रणित शिवगर्जना कामगार संघटनेच्या माध्यमातून कंपनीच्या गेटवर बेमुदत संप सुरु केले. यावेळी ८३ कामगार हातात भगवे व काळे झेंडे घेऊन राष्ट्रवादी काँग्रेस कामगार सेल प्रणित शिवगर्जना कामगार संघटनेचे अध्यक्ष संतोष बेंद्रे यांच्या नेतृत्वाखाली कंपनीच्या गेटवर बेमुदत संपावर बसले आहेत.

यावेळी कामगारांनी कंपनी व्यवस्थापकांकडे वेतनवाढीसह महागाई भत्ता, घरभाडे भत्ता, गणवेश धुलाई भत्ता, शैक्षणिक भत्ता, वैद्यकीय भत्ता, कामगार भत्ता, मासिक हजेरी बक्षीस, वार्षिक स्नेह संमेलन, विमा कवच, मृत कामगारांच्या कुटुंबीयांना मदत, शिवजयंती व गणेशोत्सव साजरा, स्वेच्छानिवृत्ती सन्मान आदी ४३ मागण्यांचे निवेदन सादर केले असून कामगारांच्या मागण्या मान्य होत नाहीत. तोपर्यंत संप सुरु ठेवण्याचा निर्धार कामगारांनी केला आहे.

कंपनीकडून संपर्क साधला असता चालढकल
शिक्रापूर येथील ट्रिनीटी इंडिया फोर्जटेक प्रायवेट लिमिटेड कंपनीचे एचआर मॅनेजर परेश पाटील यांच्याशी कामगारांच्या संपाबाबत वारंवार संपर्क साधला असता त्यांनी बैठकीत असल्याचे सांगितले. त्यानंतरही संपर्क साधल्यानंतर त्यांनी संपर्क साधला नाही.