Shikrapur Crime – आपटी (ता. शिरूर) येथील दहा महिन्यांच्या बाळाला घरी ठेवून 4 ऑगस्ट रोजी बेपत्ता झालेल्या निकिता अविनाश गाडेकर (वय 25) या महिलेचा मृतदेह पाच दिवसांनी कोरेगाव भीमा येथील फडतरे वस्ती परिसरात भीमा नदीच्या पाण्यात आढळून आला. याप्रकरणी शिक्रापूर पोलीस ठाण्यात आकस्मात मृत्यूची नोंद करण्यात आली आहे. निकिता गाडेकर या 4 ऑगस्ट रोजी घरातून बेपत्ता झाल्या होत्या.

याबाबत शिक्रापूर पोलीस ठाण्यात तक्रार दाखल करण्यात आली होती. पोलिसांकडून त्यांचा शोध सुरू असताना एका ठिकाणच्या सीसीटीव्ही चित्रणात त्या भीमा नदीच्या दिशेने जात असल्याचे दिसून आले. तसेच, वढू बुद्रुक येथील भीमा नदीवरील बंधार्‍यावरून संबंधित महिलेने नदीत उडी मारल्याचे काही नागरिकांनी पाहिल्याची माहिती पोलिसांना मिळाली.

त्यानंतर शिक्रापूर पोलिसांनी पुणे-नगर विकास प्राधिकरणाच्या अग्निशमन दलातील जवान तसेच आपदा मित्रांच्या मदतीने भीमा नदीच्या पाण्यात शोधमोहीम राबविली. मात्र, त्यावेळी महिलेचा मृतदेह आढळून आला नाही. 9 ऑगस्ट रोजी काही नागरिक कोरेगाव भीमा येथील फडतरे वस्ती परिसरात नदीकडे गेले असता त्यांना पाण्यात महिलेचा मृतदेह तरंगताना दिसला. याबाबतची माहिती मिळताच सहाय्यक पोलीस निरीक्षक हनमंतराव गिरी,

पोलीस उपनिरीक्षक उमाकांत कुंजीर, पोलीस हवालदार श्रावण गुपचे आणि संदीप कारंडे यांनी घटनास्थळी धाव घेतली. पोलिसांनी नागरिकांच्या मदतीने मृतदेह पाण्यातून बाहेर काढला. मृतदेह शवविच्छेदनासाठी पाठविण्यात आला आहे. याबाबत अविनाश भगवान गाडेकर (वय 30, रा. आपटी, ता. शिरूर) यांनी शिक्रापूर पोलीस ठाण्यात खबर दिली. त्यानुसार पोलिसांनी आकस्मात मृत्यूची नोंद केली आहे.