Shikrapur Accident- पिंपळे जगताप (ता. शिरूर) येथे शिक्रापूर चाकण रस्त्यावर गुरूवार (दि.१) पहाटेच्या सुमारास दोन मालवाहू कंटेनरची समोरासमोर जोरात धडक होऊन झालेल्या अपघातात वाहनांच्या पुढील भागाचा चक्काचूर होऊन दोन्ही चालक गंभीर जखमी झाले. दरम्यान, पहाटेपासून वाहनांच्या लांबच लांब रागा लागल्यानंतर नागरिक व पोलिसांच्या मदतीने वाहतूक कोंडी सुरळीत करण्यात आली आहे.

पिंपळे जगताप येथे शिक्रापूर चाकण रस्त्यावर पहाटेच्या सुमारास शिक्रापूर बाजूकडून चाकणच्या दिशेने चाललेल्या आणि चाकण बाजूकडून शिक्रापूरच्या दिशेने येणाऱ्या दोन्ही मालवाहू कंटेनरची समोरासमोर जोरात धडक बसून अपघात झाला. दरम्यान, कंटेनर धडक इतक्या जोरात होती की दोन्ही कंटेनरचा पुढील भाग एकमेकांच्या केबिनमध्ये अडकून राहिला.

दरम्यान, वाहनांच्या दोन्ही बाजूने लांबच लांब रांगा लागल्या. ही माहिती मिळताच पोलीस हवलदार सुजित जगताप, नागेश वाघमारे, गणेश येळवंडे, करंदीचे सामाजिक कार्यकर्ते चंद्रकांत दरेकर, महेश साबळे, सोमनाथ सोनवणे, अमोल राठोड आदींनी घटनास्थळी धाव घेत जखमी वाहन चालकांना उपचारासाठी रुग्णालयात हलवले. यावेळी एका कंटेनरच्या पुढील भागामध्ये अडकलेल्या चालकाला बाहेर काढण्यासाठी तब्बल अर्धा तास प्रयत्न करावा लागला.

यावेळी चाकण बाजूने कंटेनर चालकाने समोरील वाहनाला धडक दिल्याने अपघात झाल्याच्या चाकण बाजूकडून आलेल्या कंटेनर मध्ये दहा टन वजनाच्या लोखंडी कॉईल असल्याने त्या बांधलेल्या साखळ्या तुटल्याने कॉइल केबिनवर आदळून मोठा अपघात झाल्याचा अंदाज पोलिसांनी वर्तविला आहे. यावेळी पोलीस व नागरिकांनी वाहतूक कोंडी सुरळीत करीत क्रेनच्या मदतीने अपघातग्रस्त वाहने बाजूला घेतली.

अपघातात कंटेनर चालक दिलीप यादव (रा. पनवेल, मुंबई) व चालक अली अहमद (रा. पुणे) हे दोघे गंभीर जखमी झाले असल्याने एकावर ससून रुग्णालयात तर एकावर खासगी रुग्णालयात उपचार सुरू आहेत. पुढील तपास शिक्रापूर पोलीस करीत आहेत.