Shashikant Shinde – कोरेगाव पोलीस ठाण्याचे पोलीस निरीक्षक घनश्याम बल्लाळ यांच्या पक्षपाती, अन्यायकारक व राजकीय दबावाखालील कार्यपद्धतीविरोधात राष्ट्रवादी काँग्रेस शरदचंद्र पवार पक्षाचे प्रदेशाध्यक्ष आ. शशिकांत शिंदे यांनी सोमवारी थेट कोरेगाव पोलीस ठाण्यात ठिय्या आंदोलन छेडले. सकाळी ११ वाजल्यापासून पोलीस निरीक्षकांच्या दालनात सुरू असलेले हे आंदोलन दुपारी ३ वाजता अपर पोलीस अधीक्षक वैशाली कडूकर यांनी तक्रारींची सखोल चौकशी करून दोषींवर कारवाई करण्याचे ठोस आश्वासन दिल्यानंतर तूर्तास मागे घेण्यात आले.आसरे येथील राष्ट्रवादी काँग्रेस शरदचंद्र पवार पक्षाच्या पदाधिकारी व कार्यकर्त्यांवर जाणीवपूर्वक खोटे गुन्हे दाखल करण्यात आल्याचा गंभीर आरोप आ. शिंदे यांनी केला. पोलीस अधीक्षक तुषार दोशी स्वतः येऊन चर्चा करत नाहीत, तोपर्यंत आंदोलन मागे घेणार नाही, असा निर्धार आमदार शिंदे यांनी व्यक्त केला. पोलीस उपअधीक्षक राजश्री तेरणी यांनी मध्यस्थीचा प्रयत्न केला, मात्र तो निष्फळ ठरला. अखेर दुपारी सव्वा दोन वाजण्याच्या सुमारास अपर पोलीस अधीक्षक वैशाली कडूकर ठाण्यात दाखल झाल्या व त्यांनी आ. शिंदे यांच्याशी चर्चा केली. चर्चेदरम्यान आ. शिंदे यांनी गंभीर आरोप करत सांगितले की, कोरेगाव पोलिसांची जीप दररोज आसरे गावात जाऊन जीवघेण्या हल्ल्याचे बळी ठरलेल्या नागरिकांवरच दबाव टाकत आहे. त्यामुळे गावात भीतीचे वातावरण निर्माण झाले आहे. गावातील प्रमुख कार्यकर्त्यांना गावात येऊ न देण्यासाठी पोलिसांचा वापर होत असल्याचा आरोपही त्यांनी केला. आमदार शशिकांत शिंदे तसेच, पोलीस उपअधीक्षक व पोलीस निरीक्षकांकडून अनेक गुन्ह्यांमध्ये पक्षपातीपणा, खोटे गुन्हे दाखल करणे, अदखलपात्र तक्रारींवरून नागरिकांना विनाकारण त्रास देणे, रात्रभर पोलीस ठाण्यात थांबवणे, अवैध धंद्यांकडे जाणीवपूर्वक दुर्लक्ष करणे, निवडणुकांच्या पार्श्वभूमीवर राजकीय दबावापोटी कारवाई करणे, असे गंभीर आरोप करण्यात आले. संबंधित अधिकाऱ्यांचे तात्काळ निलंबन करण्याची मागणी आ. शिंदे यांनी केली.या आंदोलनात सहिलबाबा शिंदे, अरुण माने, राजाभाऊ जगदाळे, संजय पिसाळ, पैलवान सागर साळुंखे, ॲड. पी.सी. तथा पांडुरंग भोसले, जयवंतराव घोरपडे, प्रतापराव कुमुकले, प्रतिभा बर्गे, किशोर नानासाहेब बर्गे, राष्ट्रवादी काँग्रेसचे तालुकाध्यक्ष घनश्याम शिंदे, उद्धवसेनेचे तालुकाप्रमुख सचिन झांजुर्णे, अमरसिंह बर्गे, हेमंत बर्गे, प्रीतम बर्गे, गणेश धनावडे यांच्यासह पदाधिकारी व कार्यकर्ते सहभागी झाले होते. पोलीस ठाण्याबाहेर जोरदार घोषणाबाजी पोलिसांच्या वेळकाढूपणामुळे संतप्त झालेल्या कार्यकर्त्यांनी पोलीस ठाण्याबाहेर जोरदार घोषणाबाजी केली. पोलीस निरीक्षकांच्या निषेधार्थ घोषणा देण्यात आल्याने परिसरात तणावाचे वातावरण निर्माण झाले. परिस्थिती नियंत्रणात ठेवण्यासाठी पुसेगाव व रहिमतपूर येथील सहाय्यक पोलीस निरीक्षकांसह सातारा पोलीस मुख्यालयातून जलद कृती दलाचे जवान तैनात करण्यात आले. पोलीस शिपाई अक्षय शिंदे यांच्या विरोधात तक्रारी तडवळे संमत कोरेगाव येथील रहिवासी असलेल्या पोलीस शिपाई अक्षय सुरेश शिंदे यांच्या कार्यपद्धतीविषयीही गंभीर तक्रारी करण्यात आल्या. यासंदर्भात व्हिडिओ शूटिंग देण्याची मागणी अपर पोलीस अधीक्षक कडूकर यांनी केली. मात्र, आ. शशिकांत शिंदे यांच्या निवासस्थानी अक्षय शिंदे गेले असताना व्हिडिओ शूटिंग असूनही कोणतीही कारवाई न झाल्याचा सवाल उपस्थित करण्यात आला.
