Pratibha Pawar । Baramati news : बारामती विधानसभा मतदारसंघात प्रचार रंगत येऊ लागली आहे. दोन्ही पवार कुटुंबीय मतदारसंघात फिरताना दिसत आहे. शरद पवारांच्या पत्नी प्रतिभा पवारही युगेंद्र पवार यांचा घरोघरी जाऊन प्रचार करताना दिसत आहेत.

यावरूनच अजित पवारांनी प्रश्न उपस्थित केला आणि विधानसभा निवडणूक झाल्यावर काकींना विचारणार की, तु्म्हाला एवढा काय नातवाचा पुळका आला होता, त्या नातवाचा?, असे अजित पवार म्हणाले होते.

प्रतिभा पवार सध्या गावागावात प्रचार करीत आहेत. यावेळी त्यांच्यासह सुप्रिया सुळे यांच्या कन्या रेवती सुळेदेखील सोबत देत आहेत. आज या दोघी बारामती टेक्सटाईलमध्ये पोहोचल्या होत्या. मात्र यावेळी गेटला टाळं लावण्यात आलं होतं.

बारामतीतील टेक्सटाइल पार्कमध्ये जाण्यापासून त्यांना रोखण्यात आलं. तब्बल अर्धा तास त्यांना गेटवर थांबवून ठेवण्यात आलं. अर्धा तास झाल्यानंतरही त्यांनी आत सोडलं नाही असा दावा सुप्रिया सुळे यांच्या कार्यालयाकडून करण्यात आला आहे.

आपण खरेदी करण्यासाठी आत जात असल्याचं प्रतिभा पवारांचं म्हणणं आहे. यावेळी प्रतिभा पवार आपल्याला प्रवेश का दिला जात नाहीये, असा सवाल तेथील सुरक्षा रक्षकाला करतात. त्यावर वरिष्ठांकडून कोणालाही आत सोडण्यास परवानगी नसल्याचं गेटवरील सुरक्षा रक्षकाने उत्तर दिले.

या घटनेचा व्हिडीओ सध्या सोशल मीडियावर व्हायरल होत असून, आता बारामतीचं राजकारण चांगलंच तापण्याची शक्यता आहे. गेल्या काही दिवसांपासून शरद पवारांच्या पत्नी प्रतिभा पवार या युगेंद्र पवारांच्या प्रचारासाठी मैदानात उतरल्या आहेत. त्या अनेकांच्या भेटीगाठी देखील घेत आहेत.

खासदार सुप्रिया सुळे यांची संतप्त प्रतिक्रिया…

सुप्रिया सुळे म्हणाल्या की, माझी आई प्रतिभा पवार आणि माझी मुलगी रेवती सुळे या दोघी बारामतीतल्या टेक्सटाइल पार्कमध्ये गेल्या होत्या. त्या ठिकाणी त्यांना अर्धा तास थांबवून ठेवण्यात आल्याची मला माहिती कळाली आहे.

ज्या शरद पवारांनी बारामतीत हे पार्क उभं केलं, त्या शरद पवारांच्या पत्नीला अर्धा तास त्या ठिकाणी थांबवलं जातंय. आता सत्ता आहे म्हणून हे ठीक आहे, ते लोकांना कसेही वागवू शकतात, अशी प्रतिक्रिया त्यांनी दिली आहे.