Shankar Mandekar : आमदार शंकर मांडेकर अॅक्शन मोडवर! हातभट्टीसह सर्व अवैध धंदे ८ दिवसांत बंद करा; पोलिसांना अल्टीमेटम
Shankar Mandekar : पुणे-पिंपरीतील विषारी दारूकांडानंतर भोर-राजगड-मुळशी विधानसभा मतदारसंघात मोठी पावले; आमदार मांडेकर यांनी घेतली अधिकाऱ्यांची कडक बैठक.
Shankar Mandekar – मुळशी, भोर आणि राजगड तालुक्यांतील हातभट्टी दारूसह इतर अवैध धंदे कायमस्वरूपी बंद करण्यासाठी भोर-राजगड-मुळशी विधानसभा मतदारसंघाचे आमदार शंकर मांडेकर अॅक्शन मोडवर आले आहेत. येत्या आठ दिवसांत तिन्ही तालुक्यांतील सर्व अवैध धंदे बंद करण्याच्या स्पष्ट सूचना त्यांनी भोरचे पोलिस उपअधीक्षक राजेंद्रसिंह गौर, राज्य उत्पादन शुल्क विभागाचे पुणे विभागीय उपआयुक्त सागर धोमकर तसेच संबंधित पोलिस अधिकार्यांना दिल्या आहेत.
पुणे आणि पिंपरी-चिंचवड परिसरात मिथेनॉलमिश्रित विषारी हातभट्टी दारूमुळे अलिकडेच अनेक नागरिकांचा मृत्यू झाल्यानंतर राज्यभरात संतापाची लाट उसळली. या घटनेनंतर पोलिस आणि राज्य उत्पादन शुल्क विभागाच्या कार्यपद्धतीवर प्रश्नचिन्ह उपस्थित करण्यात आले. या पार्श्वभूमीवर आमदार मांडेकर यांनी आपल्या मतदारसंघातील अवैध धंद्यांविरोधात कठोर भूमिका घेतली आहे.
भोर शहरात अनेक वर्षांपासून मटका, बनावट दारू, गांजा, गावठी दारू आणि मोबाईलद्वारे ऑनलाइन मटका यांसारखे अवैध व्यवसाय सुरू असल्याचा आरोप करण्यात येत आहे. तसेच राजगड आणि मुळशी तालुक्यांमध्येही हातभट्टी दारूची निर्मिती आणि विक्री वाढल्याची तक्रार आहे. संबंधित अधिकार्यांकडे वारंवार तक्रारी करूनही या व्यवसायांकडे दुर्लक्ष झाल्याचे स्थानिक नागरिकांचे म्हणणे आहे. अवैध धंद्यांमुळे अनेक कुटुंबांचे आर्थिक आणि सामाजिक नुकसान होत असल्याचेही आमदार मांडेकर यांनी नमूद केले.
अवैध दारू (संग्रहित छायाचित्र)
दारूच्या व्यसनामुळे अनेकांनी शेती, मालमत्ता गमावली असून काही कुटुंबांवर उपासमारीची वेळ आली आहे. व्यसनाधीनतेमुळे आरोग्याच्या समस्या वाढत असून मुलांच्या शिक्षणावरही त्याचा विपरीत परिणाम होत असल्याचे त्यांनी सांगितले. या पार्श्वभूमीवर आमदार मांडेकर यांनी संबंधित अधिकार्यांशी संपर्क साधून आठवडाभरात तिन्ही तालुक्यांतील अवैध धंद्यांवर प्रभावी कारवाई करण्याच्या सूचना दिल्या आहेत. तसेच अपेक्षित कारवाई न झाल्यास उपमुख्यमंत्री तथा पुणे जिल्ह्याच्या पालकमंत्री सुनेत्रा पवार,
राज्य उत्पादन शुल्क आयुक्त डॉ. राजेश देशमुख आणि जिल्हा पोलिस अधीक्षक संदीप सिंग गिल यांची भेट घेऊन संबंधितांवर कठोर कारवाईची मागणी करणार असल्याचे त्यांनी स्पष्ट केले. याशिवाय आगामी विधानसभेच्या अधिवेशनात हा प्रश्न उपस्थित करून सरकारचे लक्ष वेधणार असल्याचाही इशारा त्यांनी दिला आहे. आमदार मांडेकर यांच्या या भूमिकेचे भोर, मुळशी आणि राजगड तालुक्यातील नागरिकांकडून स्वागत होत असून, समाजाला घातक ठरणारे अवैध धंदे कायमस्वरूपी बंद व्हावेत, अशी मागणी नागरिकांकडून व्यक्त केली जात आहे.
