Shani Ghat Bho – राज्यभरात उद्यापासून (दि. १४) लाडक्या श्री गणरायाच्या आगमनाने गणेशोत्सवाची धामधूम सुरू होत आहे. मात्र, भोर शहराजवळून वाहणाऱ्या नीरा नदीकाठावरील प्रसिद्ध शनि घाट परिसराची सध्या प्रचंड दुरवस्था झाली आहे. शहरासह परिसरातील अनेक घरगुती आणि सार्वजनिक मंडळांच्या गणेशमूर्तींचे विसर्जन या घाटावर केले जाते.

परंतु, ऐन उत्सवाच्या तोंडावर घाटावरील खचलेल्या पायऱ्या आणि सुरक्षेच्या अभावामुळे येथे अपघाताचा मोठा धोका निर्माण झाला आहे. गणपती विसर्जनासाठी भाविकांना नदीपात्रात उतरावे लागते. मात्र, पात्रात उतरण्याच्या मार्गावरील पायऱ्यांचे व संरक्षण भिंतीचे दगड निखळले आहेत. तसेच सुरक्षेसाठी लावलेले लोखंडी ग्रीलही तुटलेल्या अवस्थेत आहे.

सध्या या परिसरात सर्वत्र कचरा आणि घाणीचे साम्राज्य पसरले आहे. त्यामुळे गणेश विसर्जन मिरवणुकीपूर्वी या परिसराची तातडीने स्वच्छता करावी, तसेच सुरक्षिततेच्या दृष्टीने ठोस उपाययोजना कराव्यात, अशी जोरदार मागणी स्थानिक नागरिकांनी केली आहे.

कायमस्वरूपी सुरक्षेची गरज-
हा परिसर तहसील कार्यालय, प्रांत कार्यालय, बँका आणि शाळांपासून हाकेच्या अंतरावर आहे. त्यामुळे येथे शाळकरी व महाविद्यालयीन विद्यार्थी तसेच नागरिकांची नेहमीच वर्दळ असते. यापूर्वी या ठिकाणाहून नदीपात्रात उडी घेऊन काहींनी जीवनयात्रा संपवल्याच्या दुर्दैवी घटना घडल्या आहेत. त्यामुळे केवळ गणेशोत्सवापुरतेच नव्हे, तर या ठिकाणी कायमस्वरूपी सुरक्षेच्या उपाययोजना करण्याची गरज व्यक्त केली जात आहे.

“शनि घाट परिसरात प्रशासनाने कायमस्वरूपी सुरक्षेच्या उपाययोजना करणे गरजेचे आहे. विसर्जन मार्गावरील तुटलेल्या पायऱ्यांमुळे दुर्घटनेची शक्यता नाकारता येत नाही.”
-धनंजय काळे, स्थानिक नागरिक, भोर.

“भोर नगरपरिषदेच्या वतीने गणेश विसर्जन मिरवणुकीपूर्वी शहरातील प्रमुख विसर्जन स्थळांची व शनि घाटाची पूर्ण स्वच्छता करण्यात येईल. तसेच भाविकांच्या सुरक्षेच्या दृष्टीने सर्व आवश्यक उपाययोजना तातडीने केल्या जातील.”
– रामचंद्र आवारे, नगराध्यक्ष, भोर.