Shambhuraj Desai : “एमटीडीसीचा सुवर्णमहोत्सव हा महाराष्ट्र पर्यटनासाठी अभिमानाचा आणि नव्या पर्वाची सुरुवात करणारा क्षण आहे. सह्याद्रीपासून सागरकिनाऱ्यांपर्यंत पसरलेल्या राज्याच्या नयनरम्य पर्यटन ठेव्याला आधुनिक सुविधांची जोड देत महाराष्ट्राला जागतिक पर्यटन नकाशावर ठळक स्थान मिळवून देण्याचा आमचा ठाम निर्धार आहे,” अशी ठाम आणि दूरदृष्टीपूर्ण प्रतिक्रिया पर्यटन मंत्री शंभूराज देसाई यांनी व्यक्त केली. महाराष्ट्र पर्यटन विकास महामंडळ (एमटीडीसी) च्या स्थापनेच्या सुवर्णमहोत्सवी वर्षानिमित्त विशेष तयार करण्यात आलेल्या लोगोचे अनावरण करण्यात आले. यावेळी सुवर्णमहोत्सवी कॅलेंडर आणि दैनंदिनीचे प्रकाशनही उत्साहपूर्ण वातावरणात पार पडले. हा सोहळा महाराष्ट्र पर्यटनाच्या सुवर्णप्रवासाचा साक्षीदार ठरला. या कार्यक्रमास पर्यटन राज्यमंत्री इंद्रनील नाईक, खनिकर्म राज्यमंत्री डॉ. पंकज भोयर, अपर मुख्य सचिव अश्विनी भिडे, पर्यटन विभागाचे प्रधान सचिव संजय खंदारे, पर्यटन संचालनालयाचे सहसंचालक संतोष जाधव, एमटीडीसीचे व्यवस्थापकीय संचालक निलेश गटणे, उपसचिव संतोष रोकडे तसेच अधिकारी व कर्मचारी उपस्थित होते. १९७५ मध्ये स्थापन झालेल्या महाराष्ट्र पर्यटन विकास महामंडळाने गेल्या पाच दशकांत राज्याच्या पर्यटन विकासाला नवे आयाम दिले आहेत. पर्यटनासाठी आवश्यक पायाभूत सुविधा उभारणे, पर्यटकांसाठी दर्जेदार निवास व सेवा उपलब्ध करून देणे, तसेच राज्यातील निसर्गरम्य, ऐतिहासिक आणि सांस्कृतिक पर्यटन स्थळांचा प्रभावी प्रचार-प्रसार करणे या माध्यमातून एमटीडीसीने महाराष्ट्र पर्यटनाचा मजबूत पाया घातला आहे. सुवर्णमहोत्सवी वर्षानिमित्त सादर करण्यात आलेला विशेष लोगो हा एमटीडीसीच्या ५० वर्षांच्या यशस्वी वाटचालीचे प्रतीक ठरला आहे. लोगोमध्ये ऐतिहासिक किल्ल्यांचा अभिमान, सागरकिनाऱ्यांचे आकर्षण, वनसंपदेचे वैभव, सांस्कृतिक वारसा आणि आधुनिक पर्यटन सुविधांची झेप यांचा प्रभावी संगम दिसून येतो. हा लोगो महाराष्ट्राच्या पर्यटन समृद्धीचा आणि उज्ज्वल भविष्याचा प्रेरणादायी संदेश देणारा ठरला आहे. तसेच सुवर्णमहोत्सवी कॅलेंडर आणि दैनंदिनीमध्ये राज्यातील प्रमुख पर्यटन स्थळांची आकर्षक छायाचित्रे, एमटीडीसीच्या पर्यटक निवासांची माहिती आणि पर्यटन संवर्धनासाठी राबविण्यात येणाऱ्या विविध उपक्रमांचा सविस्तर आढावा समाविष्ट करण्यात आला आहे. त्यामुळे महाराष्ट्र पर्यटनाची ओळख अधिक व्यापक स्वरूपात देश-विदेशातील पर्यटकांपर्यंत पोहोचण्यास मदत होणार आहे. सह्याद्रीच्या निसर्गरम्य पर्वतरांगांपासून सागराच्या अथांग किनाऱ्यांपर्यंत पसरलेल्या महाराष्ट्राच्या पर्यटन वैभवाला सुवर्णमहोत्सवी वर्षाच्या निमित्ताने नवी ऊर्जा मिळाली असून, राज्याच्या पर्यटन विकासाच्या नव्या पर्वाची ही प्रभावी सुरुवात ठरत आहे.
