नवी दिल्ली : देशभरात कोरोनाने थैमान घातले आहे. त्यातच मंगळवारी तब्बल 1.07 लाखांपेक्षा जास्त कोरोनाबाधित रुग्णांची नोंद झाली आहे. एका दिवसात नोंदवलेली ही आतापर्यंतची सर्वाधिक संख्या आहे. त्यामुळे केंद्र सरकारकडून सर्व राज्यांना सतर्कतेचे आदेश देण्यात आले आहेत.
याच दरम्यान पुढील चार आठवडे ‘अतिशय महत्त्वाचे’ असल्याचा इशारा केंद्र सरकारने दिला असून या महामारीची दुसरी लाट रोखण्यासाठी नागरिकांनी सहकार्य करायला हवे, असेही म्हटले आहे.

केंद्रीय आरोग्य मंत्री हर्ष वर्धन यांनी म्हटले की, नागरिकांनी मास्क लावण्यासारख्या खबरदारीच्या उपायाला जणू काही ‘तिलांजली’ दिली आहे. देशभरातील विविध राज्ये आणि केंद्रशासित प्रदेशांकडून मिळालेल्या आकडेवारीनुसार, मंगळवारी देशभरात 1.07 लाख कोरोनाबाधित रुग्ण आढळले आहेत. भारतात जानेवारी 2020 मध्ये महामारीला सुरुवात झाल्यापासून एकाच दिवसातील ही सर्वाधिक संख्या आहे.

देशात मागील तीन दिवसात दुसऱ्यांदा एक लाखांपेक्षा जास्त कोरोनाबाधित रुग्ण आढळले आहेत. भारतात रविवारी 24 तासात 1 लाख 03 हजार 558 नव्या रुग्णांची नोंद झाली होती. केंद्र सरकारने म्हटले की, देशात कोरोनाव्हायरस मागील वर्षाच्या तुलनेत यंदा वेगाने पसरत आहे आणि नागरिकांनी महामारीची दुसरी लाट रोखण्यासाठी सहकार्य करायला हवे.

केंद्र सरकारच्या दोन वरिष्ठ अधिकाऱ्यांनी मंगळवारी रात्री पत्रकार परिषदेत म्हटले की, देशात एकाच दिवशी एक लाखांपेक्षा जास्त नव्या कोरोनाबाधित रुग्णांची नोंद पुन्हा एकदा होऊ शकते आणि ही मागच्या तुलनेत अधिक असू शकते. देशात रविवारी 1 लाख 03 लाख 558 नवे कोरोनाबाधित रुग्ण आढळले होते. तर केंद्रीय आरोग्य मंत्रालयाने काल सकाळी आठ वाजता जारी केलेल्या आकडेवारीनुसार मागील 24 तासात 96 हजार 982 नव्या कोरोनाबाधितांची नोंद झाली होती.