Maharashtra Politics : मुंबईतील सांताक्रुझ पूर्वेकडील कलीना परिसरात गणेश पूजेदरम्यान शिवसेना शिंदे गटातील स्थानिक पदाधिकाऱ्यांमध्ये वाद झाल्याची घटना समोर आली आहे. या वादाचे रूपांतर हाणामारीत झाले असून, शिवसेना शाखा क्रमांक ९१ चे शाखाप्रमुख संजय महादेव तेल्होरे यांना पक्षाच्या शाखेतच मारहाण करण्यात आल्याची तक्रार आहे. (Maharashtra Politics)

या प्रकरणी वाकोला पोलिसांनी महिला विभागप्रमुख अश्विनी संदीप भोसले आणि त्यांचे पती संदीप भोसले यांच्याविरोधात गुन्हा दाखल केला आहे. मारहाणीमध्ये तेल्होरे यांच्या छातीला दुखापत झाली असून, उपशाखाप्रमुख प्रवीण दंतू गवळी यांच्या मनगटालाही दुखापत झाल्याचे पोलिसांनी नमूद केले आहे. (Maharashtra Politics)

गणेश पूजेनंतर वादाला सुरुवात

पोलिसांच्या माहितीनुसार, १४ सप्टेंबर २०२६ रोजी सायंकाळी कलीना येथील शाखा क्रमांक ९१ मध्ये गणेश चतुर्थीनिमित्त विशेष पूजेचे आयोजन करण्यात आले होते. पूजा संपल्यानंतर सायंकाळी सातच्या सुमारास महिला विभागप्रमुख अश्विनी भोसले दर्शनासाठी शाखेत आल्या. त्यांच्यासोबत त्यांचे पती संदीप भोसलेही होते. (Maharashtra Politics)

यावेळी शाखाप्रमुख संजय तेल्होरे यांनी संदीप भोसले यांना शाखेत प्रवेश करण्यास विरोध केला. संदीप भोसले पक्षविरोधी कारवायांमध्ये सहभागी असल्याचे सांगत त्यांना शाखेत येण्यापासून रोखण्यात आल्याचा दावा तक्रारीत करण्यात आला आहे. (Maharashtra Politics)

वादाचे रूपांतर हाणामारीत

संदीप भोसले यांना शाखेत येण्यास विरोध केल्यानंतर दोन्ही बाजूंमध्ये वाद झाला. तक्रारीनुसार, अश्विनी भोसले यांनी तेल्होरे यांना धक्का देत शिवीगाळ केली. त्यानंतर संदीप भोसले यांनी तेल्होरे यांना चापट मारल्याचा आरोप आहे. यानंतर तेल्होरे खाली पडल्यानंतर दोघांनी मिळून त्यांना लाथाबुक्क्यांनी मारहाण केल्याचे तक्रारीत नमूद करण्यात आले आहे. (Maharashtra Politics)

उपशाखाप्रमुखाने मध्यस्थी करण्याचा प्रयत्न केला

मारहाण सुरू असताना शाखेचे उपशाखाप्रमुख प्रवीण दंतू गवळी यांनी मध्यस्थी करण्याचा प्रयत्न केला. मात्र, त्यानंतर वाद आणखी वाढल्याचा आरोप आहे. (Maharashtra Politics)

तक्रारीनुसार, अश्विनी भोसले यांनी शाखेबाहेर पडलेला जड बांबू उचलून संजय तेल्होरे आणि प्रवीण गवळी यांच्यावर हल्ला केला. या घटनेत तेल्होरे यांच्या छातीला, तर गवळी यांच्या मनगटाला दुखापत झाल्याचे पोलिसांनी सांगितले. तसेच संदीप भोसले यांनी दगडाने हल्ला करण्याचा प्रयत्न केल्याचाही आरोप तक्रारीत करण्यात आला आहे. (Maharashtra Politics)

पोलिसांनी घटनास्थळी धाव घेतली

घटनेच्या वेळी परिसरात गस्त घालत असलेल्या वाकोला पोलिसांच्या पेट्रोलिंग व्हॅनने शाखेत धाव घेतली. पोलिसांनी दोन्ही गटांना वेगळे करत परिस्थिती नियंत्रणात आणली. जखमींना उपचारासाठी रुग्णालयात दाखल करण्यात आले. (Maharashtra Politics)

संजय तेल्होरे यांनी दिलेली तक्रार आणि वैद्यकीय अहवालाच्या आधारे वाकोला पोलिसांनी अश्विनी भोसले आणि संदीप भोसले यांच्याविरोधात BNS कलम 118(1), 115(2), 351(2), 352 आणि 3(5) अंतर्गत गुन्हा दाखल केला आहे. या प्रकरणाचा पुढील तपास वाकोला पोलीस करत आहेत. (Maharashtra Politics)