Shahu Kalamandir Satara – साताऱ्यातील नाट्य, सांस्कृतिक आणि कलाक्षेत्रासाठी महत्त्वाचे व्यासपीठ मानल्या जाणाऱ्या शाहू कलामंदिराच्या दुरावस्थेचा मुद्दा पुन्हा ऐरणीवर आला आहे. रंगकर्मींच्या एका समूहाने सोशल मीडियावर विनोदी पण उपरोधिक स्वरूपातील रील प्रसिद्ध करुन नाट्यगृहातील विविध समस्यांकडे प्रशासनाचे लक्ष वेधले आहे. या रीलची रंगकर्मी व सांस्कृतिक वर्तुळासह नागरिकांमध्ये मोठी चर्चा सुरू आहे. सातारा नगरपालिकेच्या मालकीच्या शाहू कलामंदिरात अनेक मूलभूत सुविधांचा अभाव असल्याची तक्रार रंगकर्मी सातत्याने करत आहेत.

ध्वनी व्यवस्था, स्पॉटलाईटची खराब अवस्था, प्रसाधनगृहांची अपुरी देखभाल, ग्रीनरूममधील सुविधांचा अभाव, उपहारगृह नसणे तसेच वातानुकूलन यंत्रणेतील वारंवार होणारे बिघाड या प्रमुख समस्या असल्याचे सांगितले जात आहे. नाट्यगृहाच्या देखभालीसाठी खर्च होत असला तरी प्रत्यक्ष प्रयोगांच्या वेळी आवश्यक मनुष्यबळ आणि तांत्रिक सुविधा उपलब्ध नसतात. विशेषतः सायंकाळी किंवा रात्रीच्या प्रयोगांदरम्यान कर्मचारी संख्या अपुरी असल्याने अनेक अडचणींना सामोरे जावे लागते. एखादी तांत्रिक समस्या उदभवल्यास तत्काळ मदतीसाठी जबाबदार कर्मचारी उपलब्ध नसल्याचीही नाराजी व्यक्त होत आहे.

दरम्यान, नाट्यगृह अधीक्षक शैलेश अष्टेकर यांच्याबाबत मात्र रंगकर्मींनी सकारात्मक भूमिका मांडली आहे. नाट्यगृहाची देखभाल, व्यवस्थापन आणि आवश्यक अहवाल सादर करण्याची जबाबदारी ते प्रभावीपणे पार पाडत असल्याचे अनेकांनी नमूद केले. मात्र, त्यांच्या कार्यक्षेत्राबाहेरील तांत्रिक आणि प्रशासकीय बाबींमध्ये सुधारणा होणे आवश्यक असल्याचे मत व्यक्त करण्यात आले. शाहू कलामंदिराच्या सुविधांबाबत यापूर्वीही ज्येष्ठ लंगीतकार ह्रदयनाथ मंगशेकर, ज्येष्ठ अभिनेते सयाजी शिंदे यांच्यासह अनेकांनी सार्वजनिकपणे नाराजी व्यक्त केली होती. ध्वनी व्यवस्थेतील प्रतिध्वनी (इको) समस्या, आसन व्यवस्थेतील गैरसोय आणि प्रेक्षकांच्या सुविधांचा अभाव यावर त्यांनी उपहासात्मक टीका केली होती.

सोशल मीडियावरील या रीलमुळे शाहू कला मंदिरातील समस्यांचा विषय पुन्हा चर्चेत आला असून, नगराध्यक्ष अमोल मोहिते आणि उपनगराध्यक्ष ॲड. दत्ता बनकर यांनी याची गंभीर दखल घेऊन तातडीने सुधारणा कराव्यात, अशी मागणी रंगकर्मींकडून होत आहे. शाहू कलामंदिर हे रंगकर्मींचे सांस्कृतिक व्यासपीठ राहवे, ठेकेदारी व्यवस्थेचे केंद्र नव्हे, अशा भावना नाट्यवर्तुळातून व्यक्त होतआहेत. येत्या काळात प्रशासन या मागण्यांवर काय भूमिका घेते याकडे सर्वांचे लक्ष लागले आहे.