Brij Bhushan Sharan Singh। Wrestlers’ sexual harassment – लैंगिक शोषण प्रकरणी पिडीत महिला कुस्‍तीपटूंचा जबाब दिल्‍ली उच्‍च न्‍यायालयाकडून नोंदविण्‍यात येणार आहे. तसेच या प्रकरणी भाजप नेते आणि कुस्ती महासंघाचे माजी प्रमुख बृजभूषण शरण सिंह यांनी खटला रद्‌द करण्‍याची मागणी न्‍यायालयाने फेटाळून लावली आहे. यामुळे बृजभूषण सिंह यांच्‍या अडचणी वाढल्‍या आहेत. या प्रकरणी आता पुढील सुनावणी २७ सप्‍टेंबर रोजी निश्‍िचत करण्‍यात आली आहे.

बृजभूषम शरण सिंह यांच्याविरोधात सहा महिला कुस्तीपटूंनी दाखल केलेल्या लैंगिक छळाच्या प्रकरणात एफआयआर आणि आरोप रद्द करण्याची विनंती दिल्ली उच्च न्यायालयाकडे करण्‍यात आली आहे. त्यांनी म्हटले की, केवळ पीडितांचे म्हणणे ग्राह्य धरून तपास पक्षपाती पद्धतीने करण्यात आला आहे. तसेच माझ्यावर खोटे आरोप करण्यात आले, ज्याचा कनिष्ठ न्यायालयाने विचार केला नाही.

न्या. नीना बन्सल कृष्णा यांनी म्हटले की, जर आरोप निश्चित केले गेले असतील तर सर्व काही गुणवत्तेवर फेटाळले जाऊ शकत नाही. प्रत्येक गोष्टीवर सर्वांगीण आदेश असू शकत नाही. जर तुम्हाला आरोपावरील आदेश रद्द करायचा असेल तर तुम्ही येऊ शकला असता. पण एकदा खटला सुरू झाल्यावर हा अप्रत्यक्ष मार्ग आहे, असे ताशेरे न्यायालयाने ओढले.

बृजभूषण सिंह यांच्या वकिलाने युक्तिवाद करण्याचा प्रयत्न केला की, एफआयआर दाखल करण्यामागे छुपा अजेंडा आहे. तक्रार करणाऱ्या कुस्तीपटूंचा बृजभूषण सिंह यांना कुस्ती महासंघाच्या अध्यक्षपदावरून काढून टाकण्याचा एक समान हेतू होता, असा दावाही त्यांच्या वकिलाने केला.

यावर उच्च न्यायालयाने बृजभूषण सिंह यांच्या वकिलाला लैंगिक छळाचा खटला फेटाळण्यासाठी सर्व युक्तिवादांसह संक्षिप्त नोट तयार करण्यासाठी दोन आठवड्यांची मुदत दिली आहे. कुस्तीपटूंच्या तक्रारीवरून बृजभूषण सिंह यांच्याविरोधात 1000 पानी आरोपपत्र दाखल करण्यात आले आहे.

याप्रकरणी आता लैंगिक छळाच्या पीडितांचे जबाब नोंदवण्यासाठी उच्च न्यायालयाकडून नोटीस बजावण्यात आल्या आहेत. यासंदर्भातील पुढील सुनावणी 10 सप्टेंबर रोजी होणार आहे. सुनावणीदरम्यान, पीडित महिला कुस्तीपटूंचे जबाब 10, 12 आणि 13 सप्टेंबर रोजी राऊस एव्हेन्यू न्यायालयाच्या अतिरिक्त मुख्य न्यायदंडाधिकारी प्रियंका राजपूत यांच्यासमोर एका वेगळ्या खोलीत नोंदवले जातील. दरम्‍यान, दिल्ली पोलिसांनी मे 2023 मध्ये सर्वोच्च न्यायालयाच्या हस्तक्षेपानंतर सिंह यांच्याविरोधात एफआयआर दाखल केला होता