हडपसर – लेकरांनो, तरुणांनो, प्रौढांनो तुम्हांला वाचायचं, मरून चालणार नाही. मरणाऱ्यांना सुखी ठेवायचं असेल, तर तुम्हाला वाचावच लागेल. हा अंधार संपणार आहे. ही वेळ कसोटीची आहे आणि ही कसोटी आपण पार करायची आहे. कोरोना कोरोना करत बसून चालणार नाही, तर योग्य काळजी घ्या काळजी घेतली तर आपल्या सावलीलाही कोरोना थांबणार नाही,असे आवाहन ज्येष्ठ समाजसेविका सिंधुताई सपकाळ यांनी केले.

ज्येष्ठ समाजसेविका अनाथांच्या माई सिंधुताई सपकाळ यांनी आज (शुक्रवार, दि. 7 मे ) रोजी मगरपट्टासिटी मधील लसीकरण केंद्रावर लसीचा दुसरा डोस घेतला. यावेळी नगरसेविका हेमलता मगर , माजी उपमहापौर निलेश मगर उपस्थित होते.

तोंडाला मास्क लावा, गर्दी करू नका, सोशल डिस्टन्सिंग ठेवा, ही वेळ म्हणजे आज जगण्याची कसोटीच आहे. कोरोनावर संघर्ष करून विजय मिळवायचा आहे, अशी खूणगाठ मनाशी बांधली पाहिजे, प्रत्येकाने एकमेकांची काळजी घ्या. सर्व समाजाला तारेवरची कसरत करायची आहे. उद्याचा दिवस आपलाच आहे. त्यामुळे मोठ्या धाडसाने या कोरोनाचा एकत्रपणे सामना करू,असा विश्वास सिंधुताई सपकाळ यांनी व्यक्त केला.