Pune Crime News : पुणे जिल्ह्यातील सासवडमध्ये समाजसेविका दिवंगत सिंधूताई सपकाळ यांच्या आश्रमात लग्नासाठी मुली आहेत, असे म्हणत आर्थिक फसवणुकीचा धक्कादायक प्रकार समोर आला आहे. या प्रकरणी जागृत नागरिकांनी सिंधूताई सपकाळ यांची मुलगी ममता सपकाळ यांना याबाबतची माहिती दिली. त्यानंतर त्यांनी या प्रकराची शहानिशा करून सासवड पोलिसांत त्यांनी लेखी तक्रार दिली असून लवकरच पुण्यातील सायबर पोलीस स्टेशनमध्ये ही तक्रार देणार असल्याचे सांगितले जात आहे. ममता सपकाळ यांनी पोलिसांना याबाबतचे काही पुरावे देखील असल्याची माहिती मिळत आहे. या प्रकरणात अनेकांची मोठी फसवणूक झाल्याचे सांगितले जात आहे. या फसवणूकीच्या प्रकारामुळे मोठी खळबळ उडाली आहे. नेमकं काय आहे प्रकरण? प्रसिद्ध समाजसेविका दिवंगत सिंधुताई सपकाळ यांच्या आश्रमात लग्नासाठी मुली आहेत, असे फोनद्वारे सांगितले जाते. या सगळ्या संदर्भात माहिती दिली जाते. त्यानंतर रजिस्ट्रेशन म्हणून 15000 रुपये फोन पे ने किंवा गुगल पे ने मागवले जातात. हा सगळा प्रकार काही जागृक नागरिकांनी सिंधूताई सपकाळ यांची मुलगी ममता सपकाळ यांच्यापर्यंत पोहचविल्यानंतर त्यांनी याची शहानिशा केली. आम्हाला लग्नासाठी मुलगी हवी आहे तुमच्याकडे मुलगी आहे का? अशा आशयाने फोन करत माहिती घेतल्यानंतर हा प्रकार उघडकीस आला आहे. या फसवणुकीसंदर्भात ममता सपकाळ यांनी सासवड पोलिसांना लेखी तक्रार दिली असून या प्रकाराची सखोल चौकशी व्हावी अशी मागणी केली आहे. तसेच माईंच्या नावाचा गैरवापर करणाऱ्यांवर कठोर कारवाई व्हावी, असे त्यांनी तक्रार पत्रात म्हटले आहे. ममता सपकाळ यांनी पोलिसांना काही स्क्रिनशॉट्स आणि कॉल रेकॉर्डिंगचे पुरावेही सादर केले आहेत. सिंधुताई सपकाळ माईंच्या नावाचा गैरवापर करून जर कोणी फसवणूक करत असेल, तर ती बदनामी आम्ही खपवून घेणार नाही, असा इशारा ममता सपकाळ यांनी दिला आहे. हेही वाचा: पुण्यात १० जूनला मोठी राजकीय घडामोड घडणार? राष्ट्रवादी काँग्रेस पक्षाच्या वर्धापन दिनाकडे सगळ्यांचे लक्ष
