पुणेः जेष्ठ कीर्तनकार डॅा. किसन महाराज साखरे यांचे वयाच्या ८९ व्या वर्षी अल्पशा आजाराने सोमवारी रात्री उशिरा निधन झाले आहे. प्रकृती बिघडल्याने दोन दिवसांपूर्वी त्यांना चिंचवड येथील रुग्णालयात दाखल करण्यात आले होते. मात्र, उपचार सुरू असतानाच त्यांना हृदयविकाराचा झटका आला आणि त्यांची प्राणज्योत मालवली. साखरे हे संत साहित्याचे अभ्यासक आणि वारकरी सांप्रदायाचे वसा जपणारे जेष्ठ कीर्तनकार होते.

साखरे महाराजांनी संस्कृत आणि मराठीतून एकूण ११५ ग्रंथ लिहिले आहेत. त्यात प्रामुख्याने सार्थ ज्ञानेश्वरी, सार्थ एकनाथी भागवत, सार्थ तुकाराम महाराज गाथा, सार्थ भगवद्गीता, सार्थ ब्रह्मसूत्र, सार्थ उपनिषद, सोहम योग, ज्ञानेश्वर महाराज चरित्र आदी ग्रंथसंपदेचा समावेश होतो. साखरे महाराज यांनी श्री क्षेत्र आळंदीच्या ज्ञानेश्वर महाराज संस्थेच्या विश्वस्त पद देखील भूषवलेले आहे. तसेच आळंदी, देहू परिसर विकास सूकाणू समितीच्या अध्यक्षपदी देखील त्यांनी काम केले आहे. याशिवाय ग्रंथराज ज्ञानेश्वरीची दृकश्राव्य प्रत त्यांनी प्रकाशित केली आहे.