Tukaram Mundhe – राज्याचे अन्न व औषध प्रशासन आयुक्त तुकाराम मुंढेंच्या कारवाईचा धडाका सुरुच असून आता दूध सम्राटांकडे त्यांनी आपली नजर वळवली आहे.

त्याच अनुषंगाने नियमावली सादर करण्यात आली असून सेव्ह फुड, सेव्ह ड्रग ही मोहिम हाती घेण्यात आली आहे. ग्राहकांच्या ताटात दूध, दुग्धजन्य पदार्थ पोहोचण्यापर्यंतची निर्बंध स्पष्ट नमूद करण्यात आले आहे.

राज्‍यात दुधातील भेसळ हा महत्त्वाचा मुद्दा ठरत आहे. यामुळे नागरिकांच्या सुरक्षेचा प्रश्न ऐरणीवर आला आहे. या पार्श्वभूमीवर अन्न व औषध प्रशासनाचे आयुक्त तुकाराम मुंढे यांनी पत्रकार परिषद घेत दूध उत्पादकांसाठी नवे नियम लागू केले आहेत.

तसेच हे नियम दूध उत्पादकापासून ते ग्राहकापर्यंत सर्वांना लागू असतील, असेही त्यांनी स्पष्ट केले आहे. तुकाराम मुंढे म्हणाले, आपल्या अन्नात सगळ्यात महत्वाचा घटक असतो तो म्हणजे दूध.

मी दूध उत्पादकांसोबत एक बैठक घेतली होती. त्यांना सादरीकरण दाखवले असून दूध प्रोडक्ट इकोसिस्टम असली पाहिजे. दुधातली भेसळ, कृत्रिम दूध या सगळ्या संबंधी नियमावली जारी केली आहे.

दूध उत्पादकांना पॅकर्सपासून विक्रेत्यांपर्यंत नियम सर्वांना लागू असणार. दूध आणि दुग्धजन्य पदार्थातील भेसळ रोखण्यासाठी 2006, 2011 आणि इतर 8 प्रकारच्या नियमांचे पालन होणे अत्यावश्यक असल्याचे त्‍यांनी सांगितले.

दुध संकलन केंद्र, दूध कुलिंग सेंटर, किरकोळ विक्रेते, बल्क दूध विक्री करणारे, पनीर, खवा, लोणी, क्रीम, चीज, आयस्क्रीम विक्रेते या सगळ्यांना हे नियम लागू असणार आहेत.

या सर्वांनी नियमांचे तंतोतंत पालन करावे. जेणेकरून ग्राहकाच्या थाळीत सुरक्षित आणि दर्जेदार दूध पोहोचेल. त्यात कोणत्याही प्रकारची भेसळ किंवा छेडछाड असणार नाही, असा इशाराच त्यांनी यावेळी दिला.

अनियमितता आढळून आल्या

– दूधामध्ये पाण्याची भेसळ

– कृत्रिम दूध तयार करून विक्री

– युरिया, डिटर्जेंट, कॉस्टिक सोडा, स्टार्थ, ग्लुकोज मेलामाइन इत्यादी रसायनांचा वापर

– मिल्क फॅट एसएनएफ मानकांचे उल्लंघन

– शीतसाखळीचे पालन न करणे

– विनापरवाना अथवा विना नोंदणी व्यवसाय

– चुकीचे लेबलिंग व ग्राहकांची दिशाभूल