नवी दिल्ली : भारताचा अविभाज्य भाग असणारा जम्मू-काश्मीर आणि लडाखचा प्रदेश सौदी अरेबियाने जारी केलेल्या एका नकाशामधून वगळला आहे. सौदी अरेबियाच्या या चुकीच्या नकाशाबद्दल भारताने कठोर शब्दामध्ये निषेध नोंदवला आहे. सौदी अरेबियाने हा वादग्रस्त आणि चुकीचा नकाशा जी-२० देशांच्या परिषदेच्या निमित्ताने २० रियालच्या चलनी नोटेवर छापला आहे. मात्र हा नकाशा चुकीचा असल्याचे सांगत भारताने या चुकीच्या नकाशासंदर्भातील मुद्दा उपस्थित करत नाराजी व्यक्त केल्याचे वृत्त एका इंग्रजी वृत्तवाहिनीने दिले आहे.

सौदी अरेबियाने नकाशामध्ये बदल केला नाही तर भारत पुढील महिन्यात होणाऱ्या जी २० परिषदेला उपस्थित राहण्याची शक्यता कमी असल्याचेही सांगण्यात येत आहे. जी २० परिषदेच्या पार्श्वभूमीवर २० रियाची नवीन नोट जारी करण्यात आली आहे. यामध्ये एका बाजूला सैदीचे राजे सलमान आणि जी२० सौदी परिषदेचा लोगो छापण्यात आला आहे. तर दुसऱ्या बाजूला जागतिक नकाशा छापून त्यामध्ये जी २० मध्ये कोणते देश आहेत हे दर्शवण्यात आले आहे. मात्र या नकाशामध्ये जम्मू-काश्मीर आणि पाकव्याप्त काश्मीर हे स्वतंत्र प्रदेश दाखवण्यात आले आहेत. या नकाशामध्ये पाकव्याप्त काश्मीरमधील गिलगिट आणि बाल्टिस्तानचा प्रदेशही दाखवण्यात आलेला नाही.

पाकव्याप्त काश्मीरमधील जनतेवर होणाऱ्या अन्यायाविरोधात लढणाऱ्या अमझद आयुब मिर्झा यांनी हा नकाशामध्ये पाकिस्तानसाठी मोठा धक्का असल्याचे म्हणत सौदीने जारी केलेल्या नकाशाचा फोटो ट्विट केला आहे. “सौदी अरबने पाकिस्तानच्या नकाशामधून पाकव्याप्त काश्मीरमधील गिलिगिट आणि बाल्टिस्तानचा प्रदेश काढून टाकला आहे,” असे मिर्झा यांनी म्हटले आहे. मात्र नवी दिल्लीतील भारतीय अधिकाऱ्यांनी सौदी अरेबियाने जारी केलेला नकाशा पाहिला तेव्हा भारताच्या नकाशामध्येही फेरफार करण्यात आल्याचे लक्षात आले अशी माहिती इंग्रजी वृत्तवाहिनीला सुत्रांनी दिली.

मागील काही कालावधीमध्ये भारत आणि सौदी अरेबियाचे संबंध बरेच सुधारले असून दोन्ही देश मित्रराष्ट्र आहेत. ऑक्टोबर २०१९ मध्ये पंतप्रधान नरेंद्र मोदी यांनी रियादला भेट दिली होती. यावेळी भारत आणि सौदीमध्ये झालेल्या करारानुसार सौदीच्या व्हिजन २०३० अंतर्गत भारत हा सहकारी देश असेल असं सौदीच्या राजांनी म्हटले होते. दोन्ही देशांच्या नेत्यांनी संबंध अधिक सुदृढ करण्यासंदर्भात चर्चा केली होती.