Satara Schools – शाळांमधील विद्यार्थिनींना सॅनिटरी नॅपकिन पुरवण्याच्या सर्वोच्च न्यायालयाच्या आदेशानुसार सातारा जिल्ह्यातील शाळांमधील दीड लाख विद्यार्थिनींना सॅनिटरी नॅपकिन पुरवण्यात येत असल्याची माहिती माध्यमिक शिक्षणाधिकारी धनंजय चोपडे यांनी दिली.मुलींना साधारणपणे 14 व्या वर्षी मासिक पाळी यायला सुरुवात होते.

या दिवसात मुलींच्या आरोग्याची अधिक काळजी घेणे गरजेचे असते. शाळेत आल्यावर मुलींना मासिक पाळी आल्यास, त्यांना सॅनिटरी नॅपकिनची गरज भासते. हे विचारात घेऊन, शाळांमध्ये सॅनिटरी नॅपकिन उपलब्ध करण्याचा आदेश सर्वोच्च न्यायालयाने दिला आहे. त्यानुसार जिल्ह्यातील सर्व शाळांमधील दीड लाख मुलींना सॅनिटरी नॅपकिन्स पुरवण्यात येत आहेत.

त्यासाठी शाळांमध्ये सॅनिटरी नॅपकिन व्हेंडिंग मशीन बसवण्यात आल्याची माहिती चोपडे यांनी दिली. प्रत्येक शाळेेत समुपदेशकाची नेमणूक करण्यात आली आहे. हे समुपदेशक मुलींना वेळोवेळी मार्गदर्शन करतात. सर्वोच्च न्यायालयाच्या आदेशानुसार आता सर्व शाळांचे सर्वेक्षण करण्यात येणार आहे.

ज्या शाळांमध्ये सॅनिटरी नॅपकिन्स पुरवण्यात येत नाहीत, त्यांना ते पुरवण्याच्या सक्त सूचना देण्यात येणार आहेत. जिल्ह्यातील 100 शाळांमध्ये सॅनिटरी नॅपकिन्स व्हेंडिंग मशीन नाहीत. या शाळांचे सर्वेक्षण करुन ही व्हेंडिंग मशीन बसवण्यात येणार आहते. शाळेतील मुलींच्या शिक्षणाबरोबर आरोग्याकडेही शिक्षण विभाग लक्ष देत आहे, असेही चोपडे यांनी सांगितले.