Satara Sangli MLC Election – विधानपरिषदे निवडणुकीसाठी सातारा सांगली स्थानिक स्वराज्य संस्था मतदारसंघातील निवडणुकीत बाजी कोण मारणार याची उत्सुकता शिगेला पोहचली आहे. सातारा व सांगली जिल्ह्यातील १२ मतदान केंद्रांवर गुरुवारी मतदान प्रक्रिया पार पडली होती. दोन्ही जिल्ह्यातील ९९.८९ मतदारांनी मतदानाचा हक्क बजावला होता. उद्या (दि. २२) सकाळी ८ वाजता सांगलीतील तरुण भारत व्यायाम मंडळाच्या इमारतीत मतमोजणी होणार आहे.

या निवडणुकीत महायुतीचे धैर्यशील कदम आणि महाविकास आघाडीचे अभयसिंह जगताप यांच्यात प्रमुख लढत झाली होती. जिल्हा परिषदेतील मतभेदानंतर महायुतीतील राष्ट्रवादी काँग्रेस व एकनाथ शिंदे यांची शिवसेना प्रारंभी भाजपपासून दूर होती. मात्र, मुख्यमंत्री देवेंद्र फडणवीस यांनी मध्यस्थी केल्यानंतर पालकमंत्री शंभूराज देसाई व मंत्री मकरंद पाटील यांनी आम्ही महायुतीबरोबरच असल्याचे जाहीर केले होते. मात्र, दोन्ही पक्षांच्या मनात भाजपबद्दल काही अंशी नाराजीचा सूर होता. त्यामुळे महायुतीला मतदान झाले की क्रॉस व्होटिंग झाले हे पाहवे लागणार आहे.

या निवडणुकीसाठी सातारा व सांगली जिल्ह्यातील ८९५ मतदारांना मतदानाचा हक्क होता. सातारा जिल्ह्यातील शंभर टक्के मतदारांनी मतदानाचा हक्क बजावला होता. सांगली जिल्ह्यात एक मतदार अनुपस्थित राहिला. या मतदारसंघात महायुतीचे मतदार जास्त असल्याने भाजपचे धैर्यशील कदम मोठ्या फरकाने विजयी होतील, असा दावा भाजपकडून करण्यात येत आहे. तर अभयसिंह जगताप यांच्या रुपाने महाविकास आघाडी यावेळी चमत्कार घडवेल, असा दावा महाविकास आघाडीकडून करण्यात येत आहे.