Satara: शक्तीची उपासना, भक्तीचा जागर आणि उत्साहाची नऊ दिवसांची पर्वणी… शारदीय नवरात्रोत्सवाच्या स्वागतासाठी सातारा शहरासह जिल्ह्यात आता लगबग वाढली आहे. घराघरांत घटस्थापनेची तयारी सुरू असतानाच सार्वजनिक मंडळांच्या मंडपांनीही आकार घेतला आहे. कुंभारवाड्यात देवीच्या मूर्तींना अंतिम रूप देण्यासाठी मूर्तिकारांची धावपळ सुरू असून, बाजारपेठेत पूजेचे साहित्य आणि उपवासाच्या पदार्थांच्या खरेदीसाठी महिलांची गर्दी वाढू लागली आहे. त्यामुळे शहरात नवरात्रोत्सवाचे वातावरण हळूहळू रंगू लागले आहे.

नवरात्रोत्सव म्हणजे केवळ धार्मिक विधी नव्हे, तर श्रद्धा, परंपरा आणि सामूहिक उत्साहाचा सोहळा. घरोघरी घटस्थापना करून देवीची आराधना केली जाणार आहे. सार्वजनिक मंडळांकडूनही देवीच्या विविध रुपांची प्रतिष्ठापना करण्याची तयारी अंतिम टप्प्यात आली आहे. आकर्षक मंडप, देखणी सजावट आणि विद्युत रोषणाईने उत्सवाला झगमगाट मिळणार आहे. काही मंडळांकडून देवीच्या मूर्तींचे आगमन सोहळेही सुरू झाले आहेत.

गावोगावी ग्रामदेवतांच्या मंदिरांची स्वच्छता, रंगरंगोटी आणि विद्युत रोषणाईची कामे पूर्णत्वाकडे जात आहेत. नऊ दिवसांच्या धार्मिक कार्यक्रमांसह गरबा आणि दांडियाच्या आयोजनासाठीही मंडळांकडून नियोजन केले जात आहे. भक्ती आणि उत्साहाच्या या संगमातून साताऱ्यात दुर्गोत्सवाची चाहूल अधिक गडद झाली आहे.

मूर्तिकारांची रात्रंदिवस धावपळ

साताऱ्यातील कुंभारवाड्यासह जिल्ह्यातील मूर्तिकारांच्या कार्यशाळांमध्ये सध्या लगबग वाढली आहे. दोन फुटांपासून ते दहा फुटांपर्यंतच्या देवीच्या मूर्तींना रंगकाम आणि सजावटीचा अखेरचा साज चढवला जात आहे. देवीच्या चेहऱ्यावरील भाव, मुकुट, अलंकार आणि वस्त्रांची सजावट याकडे विशेष लक्ष दिले जात आहे. वेळेत मूर्ती मंडळांच्या ताब्यात देण्यासाठी मूर्तिकारांची धावपळ सुरु आहे.

घराघरांत स्वच्छता, बाजारात खरेदी

नवरात्रोत्सवाच्या पार्श्वभूमीवर महिलांची घरगुती तयारीही जोरात सुरू आहे. घराची साफसफाई, देवघराची सजावट, पूजेची भांडी स्वच्छ करणे आणि घटस्थापनेसाठी आवश्यक साहित्य जमवण्याची लगबग सुरू आहे. बाजारात शाबूदाणा, वरई, शेंगदाणे, सैंधव मीठ, खजूर आणि सुका मेवा यांची मागणी वाढू लागली आहे. पूजेचे साहित्य, फुले, हार आणि सजावटीच्या वस्तूंच्या खरेदीलाही वेग आला आहे.

गरबा- दांडियासाठी तरुणाई सज्ज!

नवरात्रोत्सवात देवीच्या आराधनेसोबत गरबा आणि दांडियाची रंगत अनुभवण्यासाठी तरुणाई उत्सुक आहे. विविध मंडळांकडून सांस्कृतिक कार्यक्रमांचे नियोजन सुरू असून, मंडप आणि ध्वनियंत्रणे उभारण्याची कामे वेगाने सुरू आहेत. नऊ दिवसांच्या उत्सवात पारंपरिक वेशभूषा, सामूहिक नृत्य आणि भक्तिगीतांनी शहरातील वातावरण चैतन्यमय होणार आहे.