Satara: सातारा शहरातील खण आळी परिसरातील रस्त्यावरील अतिक्रमणांचा प्रश्न आता ऐरणीवर आला आहे. रस्त्याची प्रत्यक्ष मोजणी करून अतिक्रमणांची हद्द निश्चित करण्यात आली असून, संबंधित व्यापार्‍यांना अतिक्रमणे स्वतःहून हटविण्यासाठी सात दिवसांची मुदत देण्यात आली आहे. या मुदतीत अतिक्रमणे न हटविल्यास नगरपरिषदेकडून कारवाई करण्यात येईल, असा स्पष्ट इशारा नियोजन व विकास समितीचे सभापती अशोक शेडगे यांनी दिला आहे.

नगरपरिषदेच्या शहर विकास विभागामार्फत खण आळी परिसरातील रस्त्याची मोजणी आणि अतिक्रमण निश्चितीची प्रक्रिया सुरू आहे. या कामाची सभापती शेडगे यांनी प्रत्यक्ष परिसरात जाऊन पाहणी केली. संबंधित अधिकारी व कर्मचार्‍यांकडून मोजणीची माहिती घेत त्यांनी कारवाईचा आढावा घेतला. संत नामदेव महाराज पथ अर्थात खण आळीचा रस्ता नऊ मीटर रुंदीचा आहे. मात्र, काही ठिकाणी प्रत्यक्ष रस्त्याची रुंदी साडेसात, तर काही ठिकाणी साडेआठ मीटरपर्यंत मर्यादित झाल्याचे निदर्शनास आले आहे. व्यापार्‍यांनी लावलेले लोखंडी फलक, रस्त्यात आलेल्या पायर्‍या आणि कट्ट्यांमुळे रस्त्याची उपलब्ध रुंदी कमी होत आहे. त्यामुळे मोजणी करून रस्त्याची हद्द निश्चित करण्यात आली असून, त्यानुसार अतिक्रमणे हटविण्याची कार्यवाही केली जाणार आहे.

 अशोक शेडगे यांचा इशारा

खण आळीतील संत नामदेव महाराज पथ हा नऊ मीटर रुंदीचा आहे. रस्त्याची मोजणी करून हद्द निश्चित केली आहे. व्यापार्‍यांनी रस्त्यात आलेले लोखंडी फलक, पायर्‍या, कट्टे आणि अन्य अतिक्रमणे सात दिवसांत स्वतःहून हटवावीत. नागरिकांची वाहतूक आणि रस्त्याच्या वापरात अडथळा निर्माण होऊ नये, हा कारवाईमागील उद्देश आहे. दिलेल्या मुदतीत अतिक्रमणे न हटविल्यास नगरपरिषदेमार्फत नियमानुसार कारवाई करण्यात येईल.

बारटक्के चौक, शाहू चौकाकडेही लक्ष

बारटक्के चौक आणि शाहू चौकासह खण आळी परिसरातील रस्त्यांच्या रुंदीकरणाचे नियोजन करण्यात येत आहे. रस्त्याची उपलब्ध रुंदी वाढवून वाहतुकीतील अडथळे दूर करण्याच्या दृष्टीने नगरपरिषदेने ही मोहीम हाती घेतली आहे. त्यामुळे सात दिवसांच्या मुदतीनंतर पालिका नेमकी कोणती कारवाई करते, याकडे व्यापारी आणि नागरिकांचे लक्ष लागले आहे.