Satara Railway Station – जिल्ह्यातील रेल्वे प्रवाशांच्या विविध प्रलंबित प्रश्नांबाबत खासदार उदयनराजे भोसले यांनी केंद्रीय रेल्वेमंत्री अश्‍विनी वैष्णव यांची नवी दिल्लीत रेल भवन येथे भेट घेऊन चर्चा केली. यावेळी जिल्ह्यातील रेल्वे स्थानकांवर विविध गाड्यांना थांबे देण्यासह बंद झालेल्या रेल्वे सेवा पूर्ववत करण्याच्या मागण्या करण्यात आल्या. सातारा आणि कोरेगाव तालुक्यांच्या सीमेवर जरंडेश्वर रेल्वे स्थानक असून कोविडपूर्व काळापासून मुंबईकडे जाणाऱ्या काही गाड्यांचे थांबे बंद आहेत.

त्यामुळे ११०३९/११०४० आणि ११४२५/११४२६ या गाड्यांना जरंडेश्वर येथे थांबा देण्याची मागणी करण्यात आली. यामुळे स्थानिक प्रवाशांना मोठा फायदा होणार असल्याचे उदयनराजेंनी निदर्शनास आणून दिले. १६५३३/१६५३४ या राजस्थान- कर्नाटक जोडणाऱ्या गाडीचा कराड येथील थांबा पूर्ववत करावा, तसेच १९६६८/१९६६७ म्हैसूर- उदयपूर हमसफर एक्सप्रेस आणि २२६८५/२२६८६ यशवंतपूर- चंदीगड संपर्क क्रांती एक्सप्रेस यांना सातारा येथे थांबा देण्याची मागणी करण्यात आली.

त्याचबरोबर १७३१७/१७३१८ दादर- हुबळी एक्सप्रेसचा सातारा थांबा पूर्ववत करावा, तसेच १२६२९/१२६३० म्हैसूर- निजामुद्दीन संपर्क क्रांती एक्सप्रेसला सातारा थांबा द्यावा, अशी मागणी करण्यात आली. कराडच्या दृष्टीनेही बैठकीत महत्त्वाच्या मागण्या करण्यात आल्या. ११०४९/११०५० कोल्हापूर- अहमदाबाद, २०६६९/२०६७० पुणे- हुबळी वंदे भारत आणि १६५३३/१६५३४ जोधपूर एक्सप्रेस या गाड्यांना कराड येथे थांबा देण्याची मागणी करण्यात आली.

पश्चिम महाराष्ट्रातील प्रवाशांसाठी महत्त्वाची असलेली ११०२३/११०२४ सह्याद्री एक्सप्रेस मुंबईपर्यंत पूर्ववत सुरू करावी, तसेच ११०२७ दादर- सातारा एक्सप्रेस दररोज धावावी, अशी मागणी करण्यात आली असून पंढरपूर- मोहोळ भागात जाणाऱ्या प्रवाशांना त्याचा फायदा होईल, असे स्पष्ट करण्यात आले.याशिवाय १६५८९/१६५९० राणी चेनम्मा एक्सप्रेस साताऱ्यापर्यंत वाढवावी, अशी मागणीही रेल्वेमंत्र्यांकडे करण्यात आली.