Satara: गुन्हे तपास आणि पोलीस कर्तव्यामध्ये श्‍वान पथकाचे महत्त्व अधोरेखित करणाऱ्या स्पर्धेत सातारा पोलीस दलाच्या श्‍वान पथकाने पुन्हा एकदा आपली भक्कम कामगिरी सिद्ध केली आहे. कोल्हापूर परिक्षेत्रीय स्तरावर आयोजित पोलीस कर्तव्य मेळाव्यात सातारा पोलीस दलाच्या श्‍वान पथकातील ‘आझाद’ने सुवर्णपदक पटकावत अव्वल स्थान मिळविले. उत्कृष्ट कामगिरीच्या जोरावर ‘आझाद’ची सर्वोत्कृष्ट श्‍वान म्हणून निवड करण्यात आली.

७० व्या अखिल भारतीय पोलीस कर्तव्य मेळाव्यासाठी पात्रता निश्चित करण्याच्या दृष्टीने ही परिक्षेत्रीय स्पर्धा महत्त्वाची मानली जाते. या स्पर्धेत विविध पोलीस दलांतील श्‍वानांनी कौशल्याचे प्रदर्शन केले. त्यामध्ये सातारा पोलीस दलाच्या ‘आझाद’ने अचूकता, तत्परता आणि प्रशिक्षित कौशल्याच्या जोरावर प्रतिस्पर्ध्यांवर मात केली.

सातारा पोलीस दलाच्या श्‍वान पथकासाठी ही कामगिरी विशेष अभिमानाची ठरली आहे. गेल्या काही वर्षांपासून या पथकाने स्पर्धांमध्ये सातत्याने दमदार कामगिरी करत आपली वेगळी ओळख निर्माण केली आहे. ‘सूर्या’ने २०२५ मध्ये सुवर्णपदक पटकावले, तर नागपूर येथे २०२६ मध्ये झालेल्या ६९ व्या अखिल भारतीय पोलीस कर्तव्य मेळाव्यात ‘सुरुच’ने सुवर्णपदकावर नाव कोरले. आता ‘आझाद’नेही सुवर्ण कामगिरीची परंपरा कायम ठेवत सातारा पोलिसांच्या शिरपेचात आणखी एक मानाचा तुरा खोवला आहे.

श्‍वानाच्या प्रशिक्षणामागे असलेल्या प्रशिक्षकांचे सातत्यपूर्ण परिश्रम, शिस्तबद्ध सराव आणि पोलीस कर्मचाऱ्यांची मेहनत या यशामागे महत्त्वाची ठरली. गुन्हे उकलण्यापासून ते विविध पोलीस कर्तव्यांमध्ये श्‍वान पथकाची भूमिका निर्णायक असते. त्यामुळे ‘आझाद’च्या या यशाकडे केवळ स्पर्धेतील विजय म्हणून नव्हे, तर सातारा पोलीस दलाच्या श्‍वान पथकाच्या कार्यक्षमतेची पावती म्हणून पाहिले जात आहे. सलग तीन वर्षांच्या कालावधीत राष्ट्रीय आणि परिक्षेत्रीय पातळीवरील स्पर्धांमध्ये सातारा पोलीस दलाच्या श्‍वानांनी मिळविलेल्या उल्लेखनीय यशामुळे पथकाची गुणवत्ता अधोरेखित झाली आहे. ‘आझाद’च्या सुवर्ण कामगिरीने या यशस्वी वाटचालीला नवी झळाळी मिळाली आहे.