Satara News : गणेशोत्सवाची सांगता आता विसर्जन मिरवणुकांच्या उत्साहात होत असून सातारा (Satara News) शहरात आजपासून गणेश विसर्जन मिरवणुकांना सुरुवात झाली आहे. मानाचा गणपती म्हणून ओळखल्या जाणाऱ्या प्रकाश मंडळाच्या गणरायाच्या विसर्जन मिरवणुकीला आज दुपारी पारंपरिक वाद्यांच्या गजरात दिमाखात सुरुवात झाली.

मिरवणुकीच्या प्रारंभी विधिवत आरती करण्यात आली. यावेळी शहरातील विविध मान्यवर, मंडळाचे पदाधिकारी, कार्यकर्ते तसेच गणेशभक्त मोठ्या संख्येने उपस्थित होते. ‘गणपती बाप्पा मोरया, पुढच्या वर्षी लवकर या’च्या जयघोषाने परिसर दुमदुमून गेला.

सातारा (Satara News) शहरात आज सुमारे ४० गणेश मंडळांच्या विसर्जन मिरवणुका निघणार असून, उद्या अनंत चतुर्दशीच्या दिवशी तब्बल ७० मंडळांच्या मिरवणुका निघणार आहेत. त्यामुळे शहरात गणेशभक्तांची मोठी गर्दी होण्याची शक्यता आहे.

विसर्जन मिरवणुका शांततेत, शिस्तीत आणि उत्साहपूर्ण वातावरणात पार पडाव्यात, यासाठी गणेश मंडळांनी प्रशासनाला सहकार्य करण्याचे आवाहन करण्यात आले आहे. मिरवणुकीदरम्यान नागरिकांनीही शिस्त पाळून पोलिस व प्रशासनाच्या सूचनांचे पालन करावे, असे आवाहन करण्यात आले आहे.

प्रकाश मंडळाच्या दिमाखदार मिरवणुकीने साताऱ्यातील विसर्जन सोहळ्याला उत्साहात (Satara News) सुरुवात झाली असून, पुढील दोन दिवस शहरात ‘गणपती बाप्पा मोरया’चा जयघोष घुमणार आहे.