Satara News – आखाती देशात सुरु असलेल्या युद्धामुळे गॅस सिलिंडर टंचाई निर्माण झाल्याची अफवा पसरली होती. ही अफवा शांत होत असताना गेल्या दोन दिवसांपासून पेट्रोलची टंचाई निर्माण होणार असल्याची अफवा पसरली आहे. याची धास्ती घेऊन वाहनधारकांकडून पेट्रोल पंपावर गाड्याच्या टाक्या फुल करण्यात येत आहेत. मात्र, जिल्ह्यात पेट्रोल टंचाई झालेली नाही. पेट्रोलचा साठा भरपूर असल्याची माहिती पंप मालकांनी दिली आहे. युद्धजन्य परिस्थितीमुळे गेल्या काही दिवसांपासून जिल्ह्यात कमालीच्या अफवा पसरत आहेत. युद्ध सुरु होताच इंधनाचा तुटवडा निर्माण होणार असल्याचा अंदाज वर्तविला गेला. तोच सगळीकडे गॅस सिंंलिडरचा तुटवडा निर्माण झाल्याची चर्चा सुरु झाली. ही चर्चा घराघरात पोहचताच सगळे सिंलिडर घेउन एजन्सीच्या बाहेर रांगा लावू लागले. बुकींग केलेल्या ग्राहकांपेक्षा बुकींग न केलेल्या ग्राहकांची संख्या जास्त होती. ही बाब प्रशासनाच्या लक्षात येताच त्यांनी सिंलिडर बुकींग केल्यावर 24 दिवसांनी मिळण्याची मुदत दिली. यामुळे आणखी भीतीचे वातावरण पसरले. गॅस सिलिंडर टंचाई यात काळाबाजार करणा-यांनी फायदा उचलला. 860 रुपयांचा सिंलिडर अनेक ग्राहकांना 1 हजार 200, 1 हजार 500 रुपयांना दिला. राज्यातील इतर जिल्ह्यात पुरवठा विभागाने छापा टाकून काळा बाजार करणा-यावर कारवाई केली. परंतु सातारा जिल्ह्यात कोणतीही कारवाई झाली नसल्याने अनेकांनी आश्चर्य व्यक्त केले. आता काही अंशी गॅस सिंलिडरचा पुरवठा सुरळीत होत असताना पुन्हा पेट्रोल टंचाईची अफवा दोन दिवसांपासून पसरली आहे. रात्री साडेदहानंतर पेट्रोल पंपावर पेट्रोल दिले जात नाही असे ही बोलले जात आहे. यामुळे दोन दिवसांपासून अनेक वाहनधारक पेट्रोल पंपावर गाड्या नेउन टाक्या फुल करत आहेत. बाटलीत पेट्रोल देणे बंद करण्यात आले आहे. तरी देखील काही ग्राहक पंपावरील कर्मचा-यांना विनंती करुन पेट्रोल बाटलीतून नेत आहेत. ही अफवा वाढू नये म्हणून पुरवठा विभागाने अधिकृत पत्र काढून प्रत्यक्षात जिल्ह्यात पेट्रोलचा साठा किती आहे, तो किती दिवस पुरेल याची अधिक माहिती देणे गरजेचे आहे. जिल्ह्यात पेट्रोल टंचाई नाही सातारा शहरासह जिल्ह्यात पेट्रोल टंचाई झालेली नाही. पेट्रोलचा साठा भरपूर आहे. मात्र, इतर राज्यात पेट्रोल टंचाईची परिस्थिती दिसताच महाराष्ट्रात याचीच चर्चा होते. आणि बघता बघता ही अफवा वा-यासारखी पसरते. परंतु वाहनधारकांनी घाबरुन जाउ नये, गरज असेल इतकेच पेट्रोल भरावे असे आवाहन करत आहे. – केतन दोशी, मालक, सातारा पेट्रोल डेपो
