Satara News – जिल्ह्यातील शेतकर्‍यांना होत असलेले अनुदानित रासायनिक खतांचे वितरण आता ‘फार्मर आयडी’शी जोडले जाणार आहे. अ‍ॅग्रीस्टॅक योजनेअंतर्गत राबविण्यात येणार्‍या या नव्या प्रणालीमुळे खतांची साठेबाजी आणि काळाबाजारावर प्रभावी नियंत्रण येणार आहे. शेतकर्‍यांना अचूक व थेट अनुदान मिळावे, यासाठी प्रशासनाने डिजिटल ट्रॅकिंगला प्राधान्य दिले आहे.

जिल्ह्यात सुमारे सहा लाखांहून अधिक शेतकरी फार्मर आयडी धारक असल्याने या उपक्रमाचा व्यापक फायदा होणार आहे. पारदर्शकता वाढवून वितरण प्रक्रियेत शिस्त आणण्याचा हा महत्त्वपूर्ण प्रयत्न ठरणार आहे. जिल्ह्यातील खत वितरण अधिक पारदर्शक आणि नियोजनबद्ध होण्यासाठी उपयोग होणार आहे. कोणत्या शेतकर्‍याला किती खत मिळाले, याची डिजिटल नोंद राहिल्याने साठा आणि गरज यांचा ताळमेळ राखता येईल.

जिल्ह्याच्या कृषी व्यवस्थापनात ही पद्धत महत्त्वाची सुधारणा ठरू शकणार आहे. त्यामुळे जिल्ह्यातील शेतकर्‍यांना अनुदानाचा थेट लाभ मिळण्यासाठी फार्मर आयडी उपयुक्त ठरणार आहे. केवळ नोंदणीकृत आणि शेती करणार्‍या शेतकर्‍यांना सरकारी सवलतींचा लाभ मिळेल. कृषी विभागाच्या पातळीवरही योजनांसाठी डिजिटल नोंदणी वाढवली जात असल्याने ही प्रक्रिया अधिक सुलभ होण्याची अपेक्षा आहे.

यामध्ये फार्मर आयडी प्रणालीत शेतकर्‍याची जमीन, आधार, बँक खाते आणि शेतीविषयक माहिती डिजिटल स्वरुपात एकत्र जोडली जाते. खत खरेदीवेळी ही ओळख तपासली जाईल आणि अनुदानित लाभ नोंदवला जाईल. यामुळे जिल्ह्यातील खत वितरणात फसवणूक, बोगस नोंदी आणि दुबार लाभाची शक्यता कमी होणार आहे.