Satara: आर्थिक वर्षाचा निम्म्याहून अधिक कालावधी संपत आला असताना सातारा नगरपालिकेची मालमत्ता कर आणि पाणीपट्टीची वसुली अवघी 36 टक्के झाली आहे. चालू आर्थिक वर्षात 100 टक्के वसुलीचे उद्दिष्ट गाठण्यासाठी पालिकेच्या वसुली विभागाने विशेष मोहीम हाती घेतली आहे. शहरातील सुमारे साडेसोळा हजार मिळकतधारकांकडून अद्याप कराचा भरणा होणे बाकी असल्याने थकबाकीदारांनी तातडीने कर भरावा, असे आवाहन मुख्याधिकारी विनोद जळक यांनी केले आहे. कर भरण्यास विलंब झाल्यास दरमहा दोन टक्के दंडाचा आर्थिक भार सहन करावा लागणार आहे.
नगरपालिकेच्या वसुली विभागाने दिलेल्या आकडेवारीनुसार, 1 एप्रिल ते 23 ऑक्टोबर 2026 या कालावधीत घरपट्टी आणि पाणीपट्टीतून सुमारे 18 कोटी 17 लाख रुपयांचा महसूल जमा झाला आहे. यामध्ये घरपट्टीपोटी 17 कोटी 17 लाख रुपये, तर पाणीपट्टीपोटी एक कोटी रुपये मिळाले असून याच कालावधीत शासकीय दंडापोटी नागरिकांनी 81 लाख 57 हजार रुपये भरले आहेत. त्यामुळे कर थकविण्याचा आर्थिक फटका नागरिकांना बसत असल्याचे चित्र आहे.

2026-27 या आर्थिक वर्षासाठी नगरपालिकेने घरपट्टीतून 44 कोटी 67 लाख रुपये आणि पाणीपट्टीतून चार कोटी आठ लाख रुपये असे एकूण 48 कोटी 75 लाख रुपयांचे वसुली उद्दिष्ट निश्चित केले आहे. आतापर्यंत जमा झालेला महसूल आणि निर्धारित उद्दिष्ट यातील मोठी तफावत भरून काढण्यासाठी उर्वरित कालावधीत वसुलीचा वेग वाढविणे आवश्यक आहे. पुढील सुमारे दीडशे दिवसांत उद्दिष्ट पूर्ण करण्यासाठी विभागाने नियोजन सुरू केले आहे.

दरम्यान, 16 ऑक्टोबरपासून थकीत करावर दरमहा दोन टक्के दंड लागू होणार असल्याने नागरिकांनी थकबाकीचा भरणा लवकर करावा, असे आवाहन प्रशासनाने केले आहे. नागरिकांच्या सोयीसाठी कर भरणा केंद्र सोमवार ते रविवार सकाळी 10 ते सायंकाळी 5 या वेळेत सुरू ठेवण्यात येणार आहे. दंड टाळण्याबरोबरच पालिकेच्या महसुलात भर घालण्यासाठी मिळकतधारकांनी सहकार्य करावे, असे आवाहन मुख्याधिकारी जळक यांनी केले आहे.

48.75 कोटींचे उद्दिष्ट; वसुलीचा वेग वाढविण्याची गरज
एकूण वसुलीचे उद्दिष्ट : 48 कोटी 75 लाख रुपये
घरपट्टीचे उद्दिष्ट : 44 कोटी 67 लाख रुपये
पाणीपट्टीचे उद्दिष्ट : 4 कोटी 8 लाख रुपये
23 ऑक्टोबरपर्यंतची वसुली : सुमारे 18 कोटी 17 लाख रुपये
शासकीय दंडापोटी भरलेली रक्कम : 81 लाख 57 हजार रुपये
कर भरणा केंद्राची वेळ : दररोज सकाळी 10 ते सायंकाळी 5