Satara: जिल्हा मध्यवर्ती सहकारी बँकेच्या निवडणुकीत उर्वरित 12 जागांवर रिंगणात असलेल्या 28 उमेदवारांना जिल्हा निवडणूक निर्णय अधिकारी संजय सुद्रिक यांनी निवडणूक चिन्हांचे वाटप केले. त्यानंतर अंतिम उमेदवार यादी आणि चिन्हे जिल्हा बँकेच्या प्रसिद्धी फलकावर प्रदर्शित करण्यात आली. आता निवडणुकीच्या प्रचाराला वेग येणार असून, मतदारांपर्यंत पोहोचण्यासाठी उमेदवारांची धावपळ होणार आहे.

प्राथमिक कृषी पतपुरवठा सोसायटी मतदारसंघात जावळीतील विठ्ठल गोळे यांना छताचा पंखा, ज्ञानदेव रांजणे यांना ट्रॅक्टर, महाबळेश्वरमधील संजय मोरे यांना प्रेशर कूकर, तर रूपाली राजपुरे यांना टेबल हे चिन्ह मिळाले आहे. कराडमधील उदयसिंह पाटील यांना हिरा, धनंजय पाटील यांना अंगठी, पाटणमधील शंभूराज देसाई यांना कपाट, तर सत्यजित पाटणकर यांना ऑटो रिक्षा हे चिन्ह देण्यात आले आहे. कोरेगावमध्ये सुनील खत्री यांना कपबशी, तर सुनील माने यांना स्कूटर हे चिन्ह मिळाले आहे.

माणमध्ये ग्रामविकास मंत्री जयकुमार गोरे यांना फुटबॉल, शेखर गोरे यांना कॅरम बोर्ड, तर मनोज पोळ यांना चष्मा हे चिन्ह देण्यात आले आहे. खंडाळ्यात अजय भोसले यांना खटारा, शामराव गाढवे यांना चालण्याची काठी, तर संजीव गाढवे यांना मोबाइल हे चिन्ह मिळाले आहे. फलटणमध्ये समशेर नाईक निंबाळकर यांना हेलिकॉप्टर, तर संजीवराजे नाईक निंबाळकर यांना सुटकेस हे चिन्ह देण्यात आले आहे.

अनुसूचित जातीजमाती प्रवर्गात सत्यवान कांबळे यांना बस, सुरेश गायकवाड यांना टॅक्सी, दीपक चव्हाण यांना छत्री, तर रवींद्र बडेकर यांना लिफाफा हे चिन्ह मिळाले आहे. इतर मागास प्रवर्गात संदीप पाचांगणे यांना बॅट, तर योगेश फडतरे यांना छत्री हे चिन्ह देण्यात आले आहे. विमुक्त जाती-भटक्या जमाती व विशेष मागास प्रवर्गात अर्जुन काळे यांना बशी, तर सुनील वाघ यांना किटली हे चिन्ह मिळाले आहे.

चिन्हवाटपामुळे उमेदवारांना प्रचाराची दिशा स्पष्ट झाली आहे. आगामी दिवसांत चिन्हांची ओळख मतदारांपर्यंत पोहोचवणे, स्थानिक समीकरणे जुळवणे आणि मतदारांचा पाठिंबा मिळवणे, यासाठी चुरस वाढण्याची शक्यता आहे.